Goeie voorsprong vir Proteas

2013-01-03 13:02

Kaapstad – Die Proteas het teen middagete van dag twee in die eerste toets teen Nieu-Seeland op Nuweland gemaklik met 290 lopies voorgeloop.

Suid-Afrika het die dag begin met ‘n voorsprong van 207 lopies vir die verlies van slegs drie paaltjies.

Die Kiwi’s het egter goed begin toe hulle die gevaarlike Alviro Petersen vroeg uitgeboul het. Trent Boult het Petersen se pragbeurt van 106 lopies tot ‘n einde gebring.

Faf du Plessis het hom hierna by De Villiers aangesluit en hulle kon net 26 lopies in hul vennootskap aanteken. Du Plessis is deur Kane Williamson uitgevang van Chris Martin se boulwerk af vir slegs 15 lopies.

Dean Elgar het daarna sy eerste toetslopies aangeteken en het saam met De Villiers 54 lopies om die sesde paaltjie aangeteken voor Boult hom ook pawiljoen toe gestuur het vir 21 lopies.

De Villiers en Robin Peterson was saam voor die penne toe die skeidsregters besluit het dat dit tyd vir middagete is. De Villiers staan tans op ‘n onoorwonne 61 terwyl Peterson nog nie ‘n lopie aangeteken het.

– Vir die jongste sportnuus volg Nuus24Sport op Twitter.