G’n TV-oog in 2 toetse
2010-02-06 06:38
Altus Momberg
Nagpur-Die krieketskeidsregters in die toetsreeks tussen Indië en Suid-Afrika, wat vanoggend hier begin het, gaan weer net op hul oë en ore kan staatmaak om beslissings te maak.
Die omstrede verwysingstelsel wat in die onlangse toetsreeks tussen die Proteas en Engeland gebruik is, gaan nie in dié reeks aangewend word nie.
Die skeidsregters Ian Gould van Engeland en Steve Davies van Australië staan in die eerste toets.
Hulle kan steeds die TV-skeidsregter gebruik om te help met beslissings by uithardloop- en stonkkanse, maar dít is waar die TV-skeidsregter se betrokkenheid sal eindig.
Die Internasionale Krieketraad (IKR) het onlangs aangekondig dat die voormalige kaptein van die Wes-Indiese Eilande Clive Lloyd ’n ondersoek na probleme met die verwysingstelsel gaan lei.
Die ondersoek is gelas ná Engeland se klagtes tydens die vierde toets op die Wanderers in Johannesburg.
Graeme Smith, die Protea-kaptein, het gister gesê spelers het nie veel sê in besluite oor die verwysingstelsel nie.
“As die IKR die stelsel wil gebruik, moet dit konsekwent in alle toetse gebruik word.
“Ek dink nie dit moet op ’n aan-en-af-basis aangewend word nie.
“Die IKR moet meer verantwoordelikheid neem as hy dit wil gebruik.
“Uit ’n spelersoogpunt, kan jy maar net speel volgens die reëls. Dis dieselfde vir albei spanne,” sê Smith.
Sy ervare spanmaat Jacques Kallis glo dit moet net gebruik word solank ál die hulpmiddels vir die TV-skeidsregter beskikbaar is.
“Ek was in die verlede ’n groot ondersteuner van die verwysingstelsel, maar as alles nie beskikbaar is nie, moet dit nie gebruik word nie,” sê Kallis.
Die infrarooi-kamerastelsel, oftewel Hot Spot, is nie gebruik in die onlangse reeks in Suid-Afrika nie en dit het beslissings oor vangskote agter die paaltjies bemoeilik.
Kallis het ook gesê hy glo spanne het die verwysingstelsel gebruik om 50/50-beslissings te toets, terwyl die doel slegs was om ooglopend verkeerde beslissings te verander.
“Ek dink die verwysings moet dalk van twee tot een per beurt verminder word.
“Dit sal die spanne dalk dwing om dit slegs vir die heel ergste foute te gebruik.”
Sport24 verneem ook dat die Proteas nie ontevrede is dat die stelsel nie gebruik gaan word nie.
Hulle glo in Indië, waar draaibalboulers die groot gevaar inhou en dikwels appelleer vir vangskote digby die penne, Hot Spot tot meer beslissings téén kolwers sou gelei het.
Daarsonder sal skeidsregters egter, wanneer hulle onseker is oor fyn randjies, die voordeel van die twyfel aan die kolwer gee.
-Die Burger