Gibbs kook vir span in Melbourne
2011-12-23 07:35
Bloemfontein – Die voormalige Proteas-kolwer Herschelle Gibbs was gister saam met die Aussie Shaun Marsh die kolfhelde in die Perth Scorchers se Big Bash-sege met 8 paaltjies oor die Melbourne Renegades.
Die Scorchers is met hul tweede wedstryd in die Australiese t20-krieketreeks terug op die wenpad, danksy Gibbs (57, 36 b) en Marsh (99*, 52 b) wat 95 lopies in net 9.4 boulbeurte om die eerste paaltjie aangeteken het.
Hul span het vanweë die stewige grondslag eindelik met 192/2 met nog vier balle oor geantwoord nadat die tuisspan 188/3 aangeteken het.
Marsh is as die Speler van die Wedstryd aangewys. Hy is op die nippertjie ingesluit om te wys hy is oorgehaal vir die eerste toets teen Indië wat Maandag begin.
Dit was sy eerste kolfbeurt sedert hy sy rug in die eerste toets teen Suid-Afrika in Kaapstad beseer het. Marsh het die wedstryd gepas met ’n ses reguit oor die kop van Abdul Razzaq beëindig.
Dié Pakistanse bouler gaan in Suid-Afrika se blitsreeks, die Pro20, vir die Lions speel.
Hy het as aflosbouler 34 lopies van 2.2 beurte afgestaan.
Gibbs het met Razzaq se vyfde aflewering teen die kolfblad afgewals en ’n reuse-ses oor middebaan geslaan. Hy het met Razzaq se volgende stadiger aflewering oorleef toe Andrew McDonald die vangskoot verbrou het. McDonald was later die bouler toe Gibbs op die grens gevang is.
Razzaq se landgenoot Shahid Afridi wat ook vir die Lions kom speel, het 36 lopies in sy vier boulbeurte afgestaan nadat Marsh van sy boulwerk ’n lewe gegun is.
Die Renegades se aanvangsbouler Shaun Tait (0/40), wat vir die Dolphins beskikbaar gaan wees, het ’n vinnige aflewering van 148.7 km/h afgestuur, maar kon ook nie ’n paaltjie kry nie.
Die aanvangskolwer McDonald (50, 33b) en Aaron Finch (49, 40b) en veelsydige Razzaq (27*, 17b) het die beste met die kolf vir die tuisspan gevaar.
Finch is ná sy kolfbeurt hospitaal toe met ’n vermoedelik ’n geperforeerde long, berig The Australian.Hy het 22 gehad toe Ben Edmondson hom op die ribbekas raak geboul het ná ’n onsuksesvolle trekhou.
– Die Proteas se Johan Botha en Alfonso Thomas speel vandag (09:50 op SS2) vir die Adelaide Strikers teen die Sydney Thunder.
Botha het toestemming van Krieket Suid-Afrika gekry om in die eerste deel van die blitsreeks te speel ter voorbereiding vir die kitsreeks teen Sri Lanka.
- Volg Nuus24Sport op Twitter
- Die Burger
