Gee IPL voorkeur, vra Ray Jennings
2010-03-12 11:53
Christo Buchner
Johannesburg - Die grootste krieketsirkus op aarde begin weer vandag.
Vir die volgende ses weke is al die aandag op die baie gewilde Indiese Premierliga (IPL) in Indië gevestig.
Vir Ray Jennings, voormalige afrigter van Suid-Afrika wat aan die stuur staan van Bangalore se Royal Challengers, is dit ’n wonderlike geleentheid om die energie van krieket in Indië te ervaar.
“Dit was uitstekend om die IPL in jou eie land te kon ervaar, maar wat die atmosfeer van die toernooi betref, is daar net eenvoudig niks wat by die toernooi in Indië kom nie,” het hy gesê.
Volgens dié uitgesproke afrigter kan die toernooi verbeter.
“Daar moet ’n spesifieke tydperk op die internasionale kalender geskep word waartydens die IPL beslis word.
“Dit moet voorkeur geniet.”
Jennings begin die toernooi sonder groot internasionale sterre soos Kevin Pietersen, Ross Taylor en Steve Smith.
Pietersen speel nog vir Engeland teen Bangladesj, terwyl Taylor en Smith by die eendagreeks tussen Nieu-Seeland en Australië betrokke is.
Jennings het weer die grootste Suid-Afrikaanse teenwoordigheid in die toernooi, met Jacques Kallis, Mark Boucher, Dale Steyn, Roelof van der Merwe en Dillon du Preez wat met ander internasionale sterre soos Taylor, Pietersen, Smith, die Engelsman Eoin Morgan en die Aussie Cameron White meeding om plekke in die span.
Die kampioene, die Deccan Chargers, wat in vandag se eerste wedstryd teen die Kolkata Knight Riders te staan kom, het Herschelle Gibbs in hul span, terwyl Charl Langeveldt sal hoop die Knight Riders se nuwe afrigter, Dav Whatmore, hom meer gaan gebruik as wat verlede jaar die geval was.
Ander Suid-Afrikaners wat in aksie is, is:
Chennai Super Kings: Makhaya Ntini, Albie Morkel en Justin Kemp.
Delhi Daredevils: Wayne Parnell en AB de Villiers.
Kings XI Punjab: Yusuf Abdulla.
Mumbai Indians: JP Duminy, Ryan McLaren.
Rajasthan Royals: Morné Morkel, Graeme Smith en Johann Botha.
Die eindstryd word op 25 April beslis, met die openingswedstryd, asook die eindstryd, wat in Moembai gespeel sal word.
- Sport24