Gayle se kanonkolf spook ...

2011-05-24 09:41

Sportredaksie

Moembai. – Dinsdag se eerste kwalifiserende krieketwedstryd hier vir die eindstryd van die Indiese Premierliga – tussen die Royal Challengers Bangalore en die Chennai Super Kings – is die tweede wedstryd in drie dae tussen dié spanne.

Die Suid-Afrikaners AB de Villiers en Albie Morkel speel onderskeidelik vir die Royal Challengers Bangalore en die Chennai Super Kings.

Die Challengers het Sondag se wedstryd met 8 paaltjies gewen om eerste op die puntelys te eindig. Die Super Kings, die kam­pioene, het slegs een ligapunt minder verdien.

Dinsdag se wenspan sal tot Saterdag se eindstryd in Chennai deurdring. Dit is egter nie neusie verby vir vandag se verloorder nie.

Die verloorspan kry Vrydag nog ’n kans om die eindstryd te haal. Hy sal dan in die tweede kwalifiserende wedstryd teen die wenner van Woensdag se uitspeelstryd – tussen die Mumbai Indians en die Kolkata Knight Riders – om ’n plek in die eindstryd slaags raak.

De Villiers het 10 keer in 13 van sy span se 14 wedstryde gekolf. Hy het 262 lopies aangeteken, wat 2 vyftigtalle insluit. Met die koms van Chris Gayle het hy op nr. 4 in die kolforde nie altyd soveel boulbeurte tot sy beskikking gehad nie.

Gayle is die reeks se topkolwer met 511 lopies van 273 balle in 9 kolfbeurte tot dusver. Hy het ’n gemiddelde van 85.16 en het 2 honderdtalle en 2 vyftigtalle aangeteken. Hy het 47 viere en 38 sesse gemoker.

Die Chennai Super Kings het die spanne se eerste wedstryd met 21 lopies gewen. Gayle het toe nog nie gespeel nie en Morkel-hulle sal ’n sug van verligting slaak as hulle dié lenige Jamaikaan vroeg kan uithaal.

Morkel het tot nou ’n goeie bydrae met die bal én die kolf gelewer nadat hy nie in die Wêreldbeker-toernooi vir die Proteas gespeel het nie.

Vir die jongste sportnuus volg Nuus24Sport op Twitter.

- Sport24