Gary se hoop op Zaheer
2010-12-26 09:00
Johannesburg - Sy emmersvol ervaring en kennis van Suid-Afrikaanse krieket help net mooi niks as sy spelers dit nie toepas nie.
Só het Gary Kirsten, die Indiese afrigter, gesê oor sy span se kans om die reeks teen die Proteas van vandag af gelykop te maak.
Kirsten-hulle, die nommer 1-toetsspan ter wêreld, is vroeër die week in Centurion met ’n beurt en 25 lopies verneder deur die tuisspan en vernaamste aanspraakmaker op dié kroon.
“Dis eenvoudig: ons móét 20 paaltjies plattrek voor ons eers kan begin dink aan ’n sege,” het Kirsten gesê, nadat die Indiese boulers net vier Suid-Afrikaanse paaltjies kon plattrek op SuperSportpark.
“Ons het die afgelope drie jaar gewys dat ons oor die aanval beskik om dit te doen in enige toestande, maar ons moet onsself hier opnuut bewys aan onsself en almal anders.”
Die toerspan sal boonop aangevuur word deur die terugkeer van sy skerpste boulangel, Zaheer Khan, wat die eerste kragmeting weens ’n dyspierbesering misgeloop het.
“Dis fantasties om hom terug te hê, want hy is ’n bouler van wêreldgehalte. Met hom in die span kan ons uitsien na wat
ookal oor die volgende vyf dae op ons wag,” het Kirsten gesê.
En sy kolwers sal nie wéér onkant betrap word nie, het dié voormalige Protea-ster belowe.
Die Indiërs is vir ’n skamele 136 uitgeknikker, nadat Graeme Smith die loot gewen en die besoekers eerste ingestuur het op ’n blad vól duiwels.
“Ek glo steeds dat ons goed voorbereid was vir die eerste toets, maar dat ons net bitter ongelukkig was om eerste te moes kolf op ’n moeilike blad,” het Kirsten gesê.
Tog is sy span nie moedverlore nie: “Die ouens werk so hard as wat ek hulle nóg sien werk het en is desperaat om goed te doen. As net één van ons kolwers hier aan die gang kan kom, sál ons minstens 400 aanteken in ons eerste beurt.”