'Ek was kwaad vir Hansie' – Richardson
2012-05-30 14:30
Kaapstad – Toe Hansie Cronjé tien jaar gelede in 'n vliegongeluk dood is, het krieket terselfdertyd 'n inspirerende leier en die spel se bekendste, selferkende bedrieër verloor.
"Hy was 'n wonderlike leier van mense wat in staat was om die beste uit sy spelers te kry," het 'n voormalige spanmaat en huidige afrigter van die Proteas, Gary Kirsten, gesê toe hy gevra is vir sy beste herinnering van dié sportlegende wat lewenslank vir wedstrydknoeiery geskors is.
Cronjé, wat Suid-Afrika in 27 oorwinnings en slegs 11 nederlae in 53 toetse gelei het, was die enigste passasier aan boord die ligte vliegtuig wat op 1 Junie 2002 naby George teen 'n steil hang neergestort het.
Hy was 32.
"Hansie was 'n fantastiese spanmaat en kaptein, altyd positief, entoesiasties en ondersteunend," het die Proteas se voormalige paaltjiewagter Dave Richardson gesê.
Richardson het gesê sy reaksie toe besonderhede oor Cronjé se betrokkenheid by knoeiery aan die lig gekom het, "was een van groot teleurstelling, 'n bietjie woede asook simpatie vir iets wat jy niemand toewens nie".
Nietemin het Richardson gesê dat daar 'n positiewe kant was van die onthullings wat by die King-kommissie se ondersoek na bewerings oor wedstrydknoeiery gemaak is.
"Voor die King-kommissie het die meeste mense geglo dat die probleem, as daar ooit een was, beperk was tot die sub-kontinent. Die King-kommissie was baie effektief. Die spelers is ondersoek en as hulle skulidig bevind is, is hulle gestraf."
Bykomend tot Cronjé se lewenslange skorsing is Herschelle Gibbs en Henry Williams tot die einde van 2000 geskors omdat Cronjé hulle oortuig het om swak te speel in 'n eendagwedstryd in Nagpur in ruil vir betaling.
Richardson het gesê hy glo dat die stappe wat deur die Internasionale krieketraad (IKR) geneem is om korrupsie te beveg, voldoende is.
"Vandag kan geen internasionale speler met sy hand op sy hart sê dat hy nie bewus is van die gevare en van sy verwantwoordelikhede nie. Ongelukkig wil die omkopers die spelers nie alleen laat nie; die stryd duur voort."
Kirsten het saamgestem dat die King-kommissie gehelp het om die spel skoon te kry.
"Dit het 'n beter bewustheid geskep van die gevolge om by so iets betrokke te raak."
Ali Bacher, destydse administrateur van die Verenigde Krieketraad van Suid-Afrika, het op die vooraand van die tien-jaar-herdenking van Hansie se dood gesê hy voel jammer vir die Cronjé-familie.
"Dit is iets wat hulle altyd sal bybly."
Bacher glo Cronjé het besef dat hy vasgekeer is en dat hy uit die kloue van sy omkopers wou ontsnap.
"Daar was twee voorvalle, as ek daarna terugkyk, wat gewys hoe graag hy wou ontsnap," het Bacher gesê.
"Die eerste een was in 1999 toe hy 'n aanbod aanvaar het om Glamorgan af te rig en te speel alhoewel hy steeds 'n kontrak met die Proteas gehad het."
"In daardie stadium was hy op die kruin van sy loopbaan. Ek was ontsteld met Glamorgan en het daarin geslaag om hulle te oorreed om die aanbod terug te trek."
"Die tweede voorval was terwyl die spelers in 2000 in Indië op toer was. Ek het 'n wedstrydskedule aangestuur vir 'n toer van Sri Lanka later die jaar sodat hy dit kan goedkeur. Toe kry ek 'n boodskap terug wat sê ek moet die skedule vir Shaun Pollock, onderkaptein, stuur want hy (Hansie) sal nie op die toer wees nie.
Bacher het gesê daar was baie openbare ondersteuning vir Cronjé tydens die King-kommissie.
"Baie mense het my gekritiseer vir die feit dat Hansie lewenslank geskors is, alhoewel dit die IKR se reël was en tot vandag toe glo ek dat daar ongelooflike simpatie vir hom was."
Daar was geen kommunikasie tussen ons nadat die saak aan die regering oorhandig is nie, maar hy het my een keer gebel. Hy het so sleg geklink. Hy was heeltemal verwoes."
Volg Nuus24Sport op Twitter.
- AFP
