Ego’s knou Indië, sê Harris
2010-02-12 10:20
Altus Momberg
Kolkata - Terwyl daar toenemende druk op die Indiese draaiboulers is om die tweede toets hier teen Suid-Afrika te help verower, is hul Suid-Afrikaanse eweknie, Paul Harris, vol vertroue dat hy wéér ’n beduidende rol in die Proteas se sukses kan speel.
Harris was van een van die besoekers se helde op die laaste dag van die eerste kriekettoets toe Suid-Afrika met ’n beurt en 6 lopies gewen het.
Dié lang Protea-linksdraaier, wat onder groot druk was voor die eerste toets, het vandeesweek sy boulfilosofie verduidelik nadat hy net 76 lopies in 38 boulbeurte in Indië se tweede beurt afgestaan het.
Die groot geheim, volgens Harris, is dat ’n draaier met groot geduld teen Indië se gedugte kolflys moet boul.
“Hulle het almal groot kolfego’s wanneer dit by oorsese draaiboulers kom.
“As jy hulle kan stil hou vir ’n tydperk, gaan hulle jou beslis probeer aanvat.
“Hulle gaan nie vir ses boulbeurte aanmekaar die bal uit die voetmerke wegstamp met hul beenskutte nie.
“Hulle mag dit dalk vir vyf beurte doen, maar dan gaan hul waag. En hulle almal het,” het Harris verduidelik.
Hy het ’n middelmatige reeks teen Engeland beleef en daar is druk voor die eerste toets bespiegel dat Johan Botha sy plek in die toetsspan sou neem, maar hy het sy waarde in die toets gewys.
Harris wou niemand egter probeer verkeerd bewys nie.
“Ek dink ek wou meer vir myself iets bewys. As Suid-Afrikaanse draaibouler is jy altyd in die kollig.
“Ek het vyf paaltjies in ’n beurt in die Centurion-toets teen Engeland gekry, maar twee toetse later het mense my kop geëis. Ek het gedink dat dit effe onregverdig was.”
Harris, ’n voormalige Kapenaar, steur hom ook nie daaraan dat hy daarvan beskuldig word dat hy ’n negatiewe lyn en lengte in die eerste toets geboul het nie.
“Nee ek dink dis wat die situasie in die toets vereis het. Daai middelbeurte is nogal moeilik in Indië. Jy wag totdat die bal omgekeerde swaai toelaat.
“En kom ons wees eerlik. Draaiboulers wen nie toetse vir Suid-Afrika in Indië nie.
“Ons weet ons krag lê in ons snelboulers. My taak was om sake onder beheer te hou tot en met die bal weer begin swaai het,” sê Harris.
Harbhajan Singh, Indië se voorslag-draaier, is onder druk voor die tweede toets Sondag begin, maar glo ’n mens moet eerder die Suid-Afrikaanse kolwers krediet gee vir hul vertoning in Nagpur.
“Jy kan nie in elke beurt vyf paaltjies neem nie,” het Harbhajan aan die Hindustan Times gesê.
“Hulle is hier om te speel, nie om vakansie te hou nie.” Harbhajan is vol vertroue dat sy beste peil om die draai is. “Ek weet wat om te doen om sukses te behaal. “Ek het die ondersteuning van my span. Ek gee dus nie om wat enigiemand anders sê nie.”
- Volksblad