Eers baba dán krieket vir KP
2010-03-02 12:22
Londen – Die Engelse krieketspeler Kevin Pietersen het toestemming gekry om sy vrou tydens die geboorte van hul eersteling by te staan, al sou dit tydens die Twintig20-wêreldtoernooi wat vanjaar in die Wes-Indies plaasvind, wees.
Volgens The Sun se webtuiste, is dié speler Maandag in die voorlopige 30-man groep, wat Engeland verteenwoordig, opgeneem wat teen die einde van Maart na 15 verminder sal word.
Pietersen en sy vrou Jessica Taylor verwag die koms van hul eerste kind gedurende die Twintig20-toernooi wat vanjaar vanaf 30 April tot 16 Mei plaasvind.
Die kolwer het met Engeland se toer verlede jaar na Suid-Afrika, gesê niks sal hom keer om sy vrou tydens die geboorte van hul kind by te staan nie.
Die nasionale keurder Geoff Miller het gesê hy is bereid om Pietersen na Engeland te laat terugkeer, selfs al sou dit aan die vooraand van 'n belangrike wedstryd wees.
“Die baba word eers later in die Twintig20-toernooi verwag so Pietersen kan vir Engeland aan die begin van die toernooi speel. Kevin is tevrede daarmee,” het Miller gesê.
- Sport24