Duminy moet oppas na beslissings
2010-03-03 08:36
Henk Steenkamp
Port Elizabeth - Die draaiboulers sal voortaan deur krieketkapteins nadergeroep word wanneer JP Duminy voor die paaltjies stelling inneem.
Dit sal egter nie Dinsdagaand op Nuweland in Kaapstad in die tweede wedstryd van die een halfeindstryd in die Standard Bank Pro20-reeks wees nie.
Duminy sal weens ’n handbesering wat hy op die onlangse toer van die Suid-Afrikaanse span in Indië opgedoen het, nie vir die Cobras teen die Warriors kan speel nie.
As die Warriors se wegbreker Johan Botha en die linksdraaier Nicky Bojé dalk lippe afgelek het om op Duminy toe te sak, sal hulle maar vir ’n volgende keer moet wag.
Op die toer in Indië het Duminy vyf keer gekolf.
Elke slag is hy been voor paaltjie uitgegee.
Dit sluit die tweedaagse oefenwedstryd aan die begin van die toer in.
In die twee toetse het hy drie keer gekolf en is al drie keer been voor paaltjie uit teen die draaier Harbhajan Singh.
Duminy sal met sy volgende kolfkans hoop hy word nie weer só uitgegee nie.
Volgens die statistikus Andrew Samson is daar twee kolwers in eersterangse krieket wat sewe keer ná mekaar b.v.p. uit was.
Hulle is Vishal Bhatia (vir Himachal Pradesh en North Zone) tussen Desember 2003 en November 2004, asook Alester Maregwede (vir Zimbabwe se o.23’s en die Southerns) tussen November 2005 en Mei 2007.
Volgens Samson is dit onmoontlik om vas te stel of dieselfde skeidsregters by dié b.v.p.-beslissings betrokke was.
Hy meen dit is hoogs onwaarskynlik dat die dieselfde skeidsregters vir ’n lang tydperk dieselfde kolwer ná mekaar op dié manier sou uitgee.
Duminy kan minstens daaruit moed skep.
- Beeld