Proteas beklink naelbyter, reeks

2011-01-23 18:09

Kaapstad - Suid-Afrika se krieketspan het die vyfde eendag-wedstryd teen Indië ná ‘n paar benoude oomblike met 33 lopies gewen en só die reeks van vyf wedstryde met 3-2 beklink.

Die reën vroeër in die dag het daartoe gelei dat die wedstryd effe verkort moes word tot 46 boulbeurte per kolfbeurt.

Die Proteas het in hul beurt 250 lopies opgestapel, te danke aan uitstekende kolfwerk deur Hashim Amla (116*, 132b) en Morné van Wyk (56, 63b).

Morné Morkel (4/52) het die Suid-Afrikaners se boulaanval gelei en saam met Lonwabo Tsotsobe (2/57) en Dale Steyn (2/32) deur Indië se toporde geskeur.

Suid-Afrika het Indië teen die planke gehad op 119/8, maar die mokerman Yusuf Pathan het die Protea-boulers met minagting kastei en ‘n haas ongelooflike 105 lopies van slegs 70 balle aangeteken.

Hy en die stertkant-kolwer Zaheer Khan (24, 58b) het met hul vennootskap van 100 lopies gedreig om die Proteas se partytjie te bederf, maar Morné Morkel het die deurbraak gemaak toe Faf du Plessis vir Pathan van sy boulwerk af uitgevang het.

Einste Morkel het Khan uitgevang toe dié ‘n aflewering van Tsotsobe oor die bykant-grens probeer moker het.

Suid-Afrika het die eerste wedstryd van die reeks gewen, maar toe twee wedstryde op ‘n streep verloor.

Hulle het egter die vierde wedstryd in Port Elizabeth gewen voordat hulle Sondag in Pretoria die reeks beklink het deur die vyfde wedstryd te wen.

Neem deel aan ons meningspeiling oor krieket-kommentators hier onder.