Droomdebuut vir Kyle Abbott
2013-02-24 08:30
Centurion – 'n Week gelede het Kyle Abbott nie geweet hy gaan vir die Proteas speel nie en sy internasionale loopbaan kon nie op 'n beter noot afskop nie.
"Ek het die afgelope twee dae niks geslaap nie, so my verstand funksioneer nie regtig nie," het Abbott gesê nadat hy sewe paaltjies vir 29 lopies in sy Protea-debuut in die derde en laaste toets teen Pakistan ingepalm het.
"Dit is die eerste keer wat my hande nie sweet nie en ek het nie 'n knop op my maag nie, so wanneer alles verby is, sal dit dalk stadig insink."
Die Dolphins-naatbouler is met 'n plek in die span beloon vir sy 141 paaltjies in 37 wedstryde nadat Morné Morkel hom weens 'n besering aan die derde toets onttrek het.
Gary Kirsten het Donderdag, op die vooraand van die derde toets, aan hom gesê Jacques Kallis is in die nette beseer, maar Abbott het dit nie ernstig opgeneem nie – totdat die afrigter hom 16:00 daardie middag gebel het om te sê hy speel.
"Dit was 'n spesiale dag en 'n ongelooflike paar dae met die ouens," het Abbott gesê.
"Om te sien hoe die voorste span in die wêreld dinge doen en om die hele struktuur met die ondersteuningspersoneel te ervaar is net 'n ongelooflike ervaring."
Abbott het gesê die voormalige krieketspeler Friedel de Wet het een keer aan hom gesê "om altyd 100% te gee en niks in ruil daarvoor te verwag nie", en dít het hy dié seisoen gedoen.
"Ek het uitgegaan en alles wat buite my beheer is agtergelaat. Ek dink die ander naatboulers se vertoning was dalk vandag beter as myne, maar dit was die druk wat ons aan albei kante geskep het.
"Dale Steyn en Vernon Philander is wêreldklas en dit kon vandag enigeen se dag gewees het, maar gelukkig was dit myne."
Abbott het ook gesê die Protea-kaptein Graeme Smith was fantasties en toe die kaptein ná elke boulbeurt na hom toe gekom het, was dit nie om vir hom raad te gee nie.
"Graeme het elke keer na my toe gekom om te vra of ek nou klaar is," het hy skertsend gesê.
"Die woord 'nee' het elke keer by my mond uitgekom. Hy was ongelooflik en ek is met oop arms in die span verwelkom. Ek voel regtig deel van die span en dit is maar net drie of vier dae. Dit is wonderlik."
– Volg Nuus24Sport op Twitter
- SAPA
