Domingo neem Protea-leisels vir T20

2012-12-07 15:01

Kaapstad – Die Proteas se hulpafrigter, Russell Domingo, gaan die leisels by Gary Kirsten oorneem as die hoofafrigter van die T20-span vir die reeks teen Nieu-Seeland en Pakistan.

Krieket Suid-Afrika (KSA) het Vrydag bekendgemaak dat Kirsten steeds met Domingo sal saamwerk.

“Ek is verskriklik geëerd en opgewonde om die T20-span af te rig,” het Domingo gesê.

“Om op die hoogste vlak af te rig was nog altyd een van my doelwitte en ek sien uit daarna om voort te bou op die fondasies wat ons vir die formaat gelê het.”

Kirsten het gesê dat dit vir hom die kans sal gee om op die toets- en eendagspanne te fokus en dat hy ook nou meer tyd saam met sy gesin sal kan spandeer.

“Ek werk al die afgelope 18 maande saam met Russell en ek is vol vertroue dat hy ‘n goeie werk sal doen.”

“Hy verstaan die Proteas se kultuur en sal kan voortbou op daardie kultuur met die nuwe groep T20-spelers wat ons die seisoen sal kans gee.”

Vir die jongste sportnuus volg Nuus24Sport op Twitter.
 

- SAPA