Dis Warriors teen Cobras in eindstryd
2011-12-04 19:54
Bloemfontein – Die Warriors-kaptein Colin Ingram het ‘n haastige honderdtal aangeteken om die Warriors na ‘n oorwinning met vier paaltjies oor die Knights te lei in hul Eendagbeker-halfeindstryd.
Die Knights het eerste gekolf en 280/5 aangeteken.
Ingram het 112 lopies van slegs 111 balle gemoker en ‘n vennootskap van 129 lopies om die tweede paaltjie met Arno Jacobs gedeel.
Jacobs het sy paaltjie vir 54 lopies verloor toe die 19-jarige debutant Duanne Olivier hom uitgehaal het.
Ingram het sy paaltjie teen die draaibouler Werner Coetsee verloor, maar Craig Thyssen en Johan Botha het die kolfbeurt lewend gehou met ‘n vennootskap van 45 lopies om die sesde paaltjie.
Thyssen (40*) en Wayne Parnell (5*) het hul span uiteindelik die teiken laat haal, met ses balle oor.
Die Warriors sal nou Vrydag in Kaapstad teen die Cobras in die eindstryd te staan kom.
- Volg Nuus24Sport op Twitter
- SAPA