Dale kry ruskans
2012-01-19 22:12
Kaapstad – Die Proteas-afrigter Gary Kirsten is opgewonde oor mededinging vir plekke in die span en sê dit dien sy langtermyn-strategie goed.
“Ons is in die industrie van krieketwedstryde wen, so ek hou dit in gedagte,” het Kirsten Donderdag gesê.
“Dit is egter belangrik vir ons om aan te hou bou en deurentyd sukses te behaal en om dit te doen het ons ‘n groot groep spelers nodig. Ons moet, as ‘n krieketnasie, meer as net 11 spelers kan bied.”
Die afrigter sal sy rotasiebeleid aanhou toepas vir die oorblywende twee wedstryde teen Sri Lanka in die reeks waarin Suid-Afrika reeds 3-0 voorloop.
Wayne Parnell is by die span vir die vierde eendagstryd teen Sri Lanka in Kimberley ingesluit, met Dale Steyn wat die res van die reeks ‘n ruskans sal geniet.
Parnell het laas vir die Proteas by die Wêreldbeker-kriekettoernooi in Maart verlede jaar gespeel en hy lyk skerp in die nette.
“Ons het nog die heeltyd beplan om te eksperimenteer in hierdie reeks en dit is belangrik dat ons spelers ontwikkel en groei, sodat ons ‘n groep van 16 of 17 spelers het wat ons in enige stadium kan kies,” het Kirsten gesê.
“Die opwindende ding is dat daar mededinging vir plekke in die span is en dit is belangrik – nie net in die eendagspan nie, maar ook in die Toetsspan ding mense mee om plekke.”
Kirsten het ook Suid-Afrika se nuwe eendagkaptein, AB de Villiers, geprys vir die manier waarop hy sy nuwe rol as kaptein en paaltjiewagter benader.
“AB is tot dusver heel kreatief en dit is goed vir ons,” het Kirsten gesê.
“Hy het ook die boulers verantwoordelikheid gegee, vir hulle gevra watter soort veldplasings hulle wil hê en wat hulle beplan om te doen in ‘n boulbeurt.
“Hy bring ‘n soort varsheid tot die rol, maar dit is moeilik om beide kaptein en paaltjiewagter te wees in eendag-krieket, so ons hou dit in gedagte, maar alle krediet aan hom.”
- Volg Nuus24Sport op Twitter
- SAPA