Corrie wil Proteas bou vir WB
2010-03-02 08:30
Eduan Roos
Johannesburg - Van struikelblokke na boublokke.
Dít is waarop Corrie van Zyl, Suid-Afrikaanse krieketafrigter, en sy Proteas gaan fokus in die aanloop tot aanstaande jaar se Wêreldbeker-toernooi op die subkontinent.
Dié span het Maandag uit Indië teruggekeer ná ’n tweede agtereenvolgende gelykop-uitslag in ’n toetsreeks teen die tuisspan en ’n nederlaag van 1-2 in die kitsreeks.
“Baie van dié spelers gaan Suid-Afrika aanstaande jaar (in die Wêreldbeker-toernooi) verteenwoordig en ek het heelwat wyser geword oor die span en hoe sekere spelers in dié toestande vertoon,” het Van Zyl gesê.
“Ek glo ons het nou die eerste boublokke in plek om ’n nuwe en meer bestendige span vir die toernooi te bou.”
Van Zyl is skaars ’n week voor dié toer as breier aangestel ná die skokbedanking van Mickey Arthur, maar sal nou ten minste tot na dié Wêreldbeker-toernooi aanbly.
“Dit was moeilik en die span het ook die onsekerheid aangevoel.
“’n Mens kan nooit die impak van so iets onderskat nie, maar dit is nou afgehandel en nie meer iets waaroor ons ons hoef te bekommer nie.”
Volgens Van Zyl fokus die Proteas daarop om meer bestendig te wees en in druksituasies kalm te bly.
“Dis kommerwekkend dat ons so goed kon speel in die eerste toets, maar onsself daarna in die tweede wedstryd in die steek gelaat het.”
Die Proteas het die eerste toets in Nagpur met ’n beurt en 6 lopies beklink, maar het in Kolkata self ’n beurtnederlaag op die lyf geloop.
“Bestendigheid gaan die sleutel wees om nommer een (ter wêreld) te word én te bly en ons moet kalm bly wanneer ons onder druk is,” het die afrigter gesê.
“Boonop sal groot kolfvennootskappe baie belangrik wees in Indië – en ons boulers sal moet leer dat selfs die kleinste fout op die subkontinent jou duur te staan kom.”
Intussen kan van die Proteas al môre in die tweede wedstryd van die Pro20-halfeindronde tussen die Cape Cobras en die Warriors op Nuweland in aksie wees.
Jacques Kallis (dyspier) en Mark Boucher (rug) sal egter nie vir die Warriors speel nie, terwyl die Cobras sonder Graeme Smith moet klaarkom.
Die nasionale kaptein sukkel steeds met die gebreekte pinkie wat hom uit die kitsreeks teen Indië gedwing het.
Albie Morkel sal ook die Titans se halfeindstryd Vrydag teen die Lions op SuperSportpark in Centurion weens ’n seer enkel misloop.
- Die Burger