Cook kook; Harris vat vyf
2011-10-07 08:03
Kimberley – Stephen Cook het die Lions se eerste beurt Donderdag in Kimberley met ’n onoorwonne honderdtal geanker in hul SuperSport-krieketwedstryd teen die Knights.
Met Cook (131*, 395m, 282b, 20x4) steeds voor die paaltjies, het die besoekers teen uitskeityd 297/6 gehad.
Dié aanvangskolwer het die Knights duur laat betaal vir ’n verbroude vangskoot toe hy 77 gehad het. Hy is in die eerste boulbeurt van die draaier Dean Elgar in die dekke misgevang om sy 22ste honderdtal aan te teken.
Die 300ste vangskoot van die paaltjiewagter Morné van Wyk was darem ’n effense ligpunt vir die tuisspan op ’n dag waarop die boulers behoorlik geswoeg het.
Vroeër het Alviro Petersen nie geskroom om te kolf toe hy die loot gewen het nie. Maar dié kaptein, wat altesaam 250 lopies in sy span se eerste wedstryd gemoker het, was ook die eerste kolwer terug in die paviljoen.
Petersen (35) se paaltjie was die enigste wat in die oggendskof gekantel het. Die skof ná middagete het weer net ’n enkele paaltjie opgelewer – Jonathan Vandiar (48) is gevang deur Van Wyk van die boulwerk van Ryan McLaren.
Met die eerste aflewering ná die teepouse het Van Wyk sy 300ste vangskoot in eersterangse krieket benut toe daar van die ervare Neil McKenzie (18) ontslae geraak is.
Zander de Bruyn moes met die laaste aflewering van dieselfde boulbeurt van Dillon du Preez vir ’n nulletjie terugstap toe hy uitstekend op eerste glip deur Boeta Dippenaar gevang is.
Du Preez (2/69) en McLaren (2/60) het elk twee paaltjies ingeoes.
In Pietermaritzburg het die Titans se Paul Harris die nasionale keurders aan hom herinner met ’n goeie boulvertoning teen die Dolphins.
Dié Proteas-draaibouler het sy terugkeer met boulsyfers van 5/37 gevier. Hy het onlangs ’n klein operasie ondergaan waarin ’n abses verwyder is.
Die tuisspan was op 118/6 op die agtervoet, maar hy het danksy hardnekkige kolfwerk deur Daryn Smit (77 n.u.n) en Kyle Abbott (38) eindelik 243 gekry.
Harris sê die bal het ’n klein bietjie gedraai, maar hy het sy welslae ook aan baie akkurate boulwerk toegeskryf.
Ná die welslae wat dié hotklou behaal het, is die Dolphins se Imran Tahir waarskynlik bitter spyt dat hy nie speel nie. Hy het in verlede seisoen se ooreenstemmende wedstryd 12 paaltjies laat kantel en sy onttrekking weens ’n liesbesering as voorsorgmaatreël moes vir die Titans goeie nuus gewees het.
Die Titans sal vanoggend op 20/0 voortkolf.
Vir die jongste sportnuus volg Nuus24Sport op Twitter.
– Sport24
