Cobras spoeg meer gif met Langes
2009-12-09 13:12
Altus Momberg
Kaapstad - Die Cape Cobras se boulaanval vir hul belangrike SuperSport-krieketstryd gaan versterk word met die terugkeer van Charl Langeveldt van nasionale diens.
Die Cobras, ná oorwinnings in opeenvolgende naweke oor die Warriors en die Eagles, pak die verdedigende kampioenspan, die Titans, van môre af in die Paarl.
Die Cobras en die Titans is onderskeidelik eerste en tweede op die puntelys en ’n sege vir een van die spanne sal van onskatbare waarde wees.
Langeveldt sal in Rory Kleinveldt se plek speel nadat dié bouler verlede naweek ’n liesbesering opgedoen het.
Die toestand van die kolfblad in die Paarl gaan beslis ’n groot gesprekpunt wees.
Daar was groot ongelukkigheid by die Warriors oor die toestand van die blad toe hulle einde verlede maand in die Paarl verloor het.
Russell Domingo, die afrigter van die Oos-Kaapse span, het die blad as skokkend beskryf. Balle het op die eerste dag al deurgerol.
Die wedstryd teen die Warriors was binne drie dae verby en 23 van die 31 paaltjies wat geval het, was kolwers wat skoongeboul óf been voor paaltjie uitgegee is.
Daar was omtrent niks gras op die blad te bespeur nie en die bal het baie laag gehou. Môre se wedstryd gaan egter op ’n blad gespeel word met ’n goeie grasbedekking en die wip behoort dus meer eweredig te wees.
Die blad waarop die spanne gaan speel, is egter een wat gewoonlik vir klubwedstryde gebruik word en word nie gereeld vir provinsiale wedstryde ingespan nie.
Die Protea-kolwer JP Duminy het ook gister saam met sy provinsiale spanmaats geoefen, maar hy is nie beskikbaar vir die naweek se wedstryd nie.
Dít laat die vraag ontstaan of hy en van sy mede-kolwers nie meer baat sou vind as hulle die naweek ’n eersterangse wedstryd kon speel eerder as om ’n kamp saam met die nasionale span by te woon nie.
Die Proteas het juis die laaste 18 maande hul rieme in die eerste wedstryd van reekse op eie bodem styfgeloop. Maar dit is ook te betwyfel of Duminy se selfvertroue ’n hupstoot sou kry op die Paarl se kolfblad.
- Die Burger