Cobras goed op pad na 1ste titel
2009-12-14 08:48
Johann de Jager
Bloemfontein - Die Cape Cobras seil met ’n derde agtereenvolgende oorwinning voor in die pylvak om vir die eerste keer die SuperSport-krieketreeks te wen.
Hulle het in die Paarl verlede jaar se kampioene, die Titans, hul tweede agtereenvolgende nederlaag toegedien.
Die Cobras is met 76.52 punte ná sewe van die tien wedstryde steeds die voorlopers.
Die Warriors, wat nog nooit enige franchise-kompetisie gewen het nie, is met 66.10 punte in die tweede plek en ook nog in die wedloop. Ná twee sportiewe beurtsluitings het Garnett Kruger die Warriors met ’n vyftal aan paaltjies tot ’n oorwinning oor die Dolphins in Durban geboul.
Hoewel die wedstryd tussen die Lions en Diamond Eagles in Johannesburg onbeslis geëindig het, was die punte wat die Lions verdien het genoeg om hulle met 65.66 punte in die derde plek te hou.
* Die Cobras het in die Paarl vir die derde agtereenvolgende wedstryd weer net drie dae benodig om te wen. Hulle het ’n derde agtereenvolgende tuissege en tweede agtereenvolgende beurtsege behaal deur die Titans met ’n beurt en 72 lopies te klop.
Die twee oornagkolwers van die tweede dag, Justin Kemp (93) en Robin Petersen (100), het die Cobras gehelp om 420 lopies in hul eerste beurt aan te teken.
Die besoekers, met ’n agterstand van 180, is vir net 108 in hul tweede beurt uitgeknikker.
Charl Langeveldt (4/45) en Francois Plaatjies (4/27) het elk vier paaltjies vir die wenspan geneem.
)?Henk Steenkamp berig die Warriors het hul wedstryd kort ná die middagpouse gister op Kingsmead op die vierde en laaste dag van die wedstryd wat deur reën geteister was, met 88 lopies beklink.
Kruger het die Dolphins met 5/71 in hulle tweede beurt gesink. Lonwabo Tsotsobe (3/37) het Kruger pragtig ondersteun.
Die eerste drie dae van die wedstryd is deur reën ontwrig. Albei spanne het egter met beurtsluitings kanse gewaag en lewe in die wedstryd geblaas.
Daar was oorgenoeg tyd vir die Dolphins om 275 lopies in hul tweede beurt aan te teken om te wen. Hulle het gisteroggend op 34/1 hervat waarna hulle toe vir 186 lopies uitgehaal is.
)?Die Lions het gister op die Wanderers, ná onoorwonne vyftigtalle deur Thame Tsolekile (59*) en Cliffe Deacon (50*), hul tweede beurt op 301/6 gesluit. Dit het aan die Eagles die taak gelaat om 333 in 44 boulbeurte aan te teken. Die besoekers het 114/3 gehad toe ooreengekom is om spel te staak.
Stephen Cook, aanvangskolwer van die Lions, is met sy beurte van 51 en 32 weer die voorste lopiemaker met 765 lopies ná sewe wedstryde.
Dit is omdat Dean Elgar, ná sy 98 lopies, gister deur die paaltjiewagter, Tsolekile, van Deacon se boulwerk af vir ’n nulletjie gevang is.
- Beeld