Chris Gayle maak toetsgeskiedenis

2012-11-14 17:57

Dhaka – Die Windies se aanvangskolwer Chris Gayle het Woensdag die eerste speler in die geskiedenis geword om 'n ses van die eerste aflewering in 'n toets te moker.

Volgens die BBC se webtuiste is die debutant Sohag Gazi se aflewering vir 'n ses geslaan in die eerste toets in Dhaka tussen Bangladesj en die Windies.

Dit was die 2 051ste toets in die geskiedenis sedert die eerste wedstryd in 1877, 135 jaar gelede, gespeel is.

Gazi het die mokerman uiteindelik vir 24 lopies na die kleedkamer teruggestuur.

Gayle spog nou met 84 sesse op sy toetskerfstok om gesamentlik sesde op die lys van bestes te wees.

Die voormalige Australiese paaltjiewagter Adam Gilchrist is in die eerste plek met 100 sesse.

Die 33-jarige Gayle is bekend vir sy flambojante styl en die sewe honderdtalle wat hy in Twintig20-wedstryde aangeteken het, is steeds meer as enige ander speler in die korter weergawe van die spel.

Vir die jongste sportnuus volg Nuus24Sport op Twitter.

- SAPA