Cape Cobras kry wéér streepsuiker
2010-03-05 09:55
Henk Steenkamp
Port Elizabeth
Skitterende boulwerk met ewe flink vang- en veldwerk het Donderdagaand op Nuweland in Kaapstad ‘n plek in die eindstryd van die Standard Bank Pro20-reeks vir die Warriors se krieketspan beklink.
Die Warriors het die Cobras met tien lopies in dié spanne se tweede wedstryd in die halfeindronde geklop. Vrydag het die Warriors met drie lopies gewen en hulle speel nou op 12 Maart in die eindstryd op St. Georgepark teen die Lions of Titans.
Die Warriors moes ’n klein teiken verdedig ná hulle 121/6 aangeteken het.
Die besoekers se sterk boulaanval was egter een te veel vir die Cobras op ’n blad waarop houespel nie maklik was nie.
Makhaya Ntini (2/12) was uitstekend en die draaiers Johan Botha en Nicky Bojé het die Cobras behoorlik vasgepen. Dan was Rusty Theron weer dodelik wanner dit saak gemaak het.
Soos die Warriors het die Cobras in hulle kolfbeurt sleg afgesit. Dit was 9/2 toe Andrew Puttick en Justin Ontong dit na 62 geneem het voordat Puttick (22) deur die linksdraaier Nicky Bojé b.v.p betrap is.
Kort daarna is Ontong ook uit en het die Cobras se taak moeiliker begin word. Justin Kemp (29, 25 b) het hard probeer, maar vergeefs.
In die Warriors se kolfbeurt was die besoekers van meet af aan in die knyp. Die eerste paaltjie het in die derde boulbeurt geval en daarna het die Warriors gesukkel om behoorlike herstelwerk te doen.
Die een aanvangskolwer, Ashwell Prince, het hard probeer om die beurt aanmekaar te hou. Hy was die enigste van die toporde-kolwers wat teen die Cobras se goeie boulwerk iets kon uitrig.
Hy het 25 (27b) aangeteken voordat hy te vroeg na ’n aflewering van Kemp gespeel en uitgevang is.
Die Warriors het eers teen die einde van die beurt bietjie op dreef gekom met ’n deurslaggewende onoorwonne vennootskap van 58 lopies om die sewende paaltjie.
Johan Botha (29, 27b, 2x6, 1x4) en Craig Thyssen (27, 18b) was daarvoor verantwoordelik. Thyssen het ’n swak laaste boulbeurt deur Charl Langeveldt uitgebuit deur die laaste twee aflewerings vir onderskeidelik vier en ses te slaan.
Botha en Thyssen het goed by die blad aangepas. Langeveldt was ongewoon duur. Hy het 20 lopies in sy vierde en laaste boulbeurt afgestaan.
- Die Burger