Brett Lee groet toetskrieket
2010-02-24 15:42
Sydney – Die Australiër Brett Lee, een van die vinnigste boulers in die moderne spel, het Woensdag sy uittrede uit toetskrieket aangekondig om sodoende sy internasionale loopbaan in die korter weergawe van die spel te verleng.
Die 33-jarige Lee het sy debuut in 1999 gemaak en 310 paaltjies in 76 toetse laat kantel.
Hy is die Australiër met die vierde meeste paaltjies, na Shane Warne, Glenn McGrath en Dennis Lillee.
“Hierdie is nie die einde nie. Ek het nog baie krieket in my. Toetskrieket moet gaan sodat ek my kitskrieket-loopbaan vir Australië kan voortsit,” het die snelbouler tydens ‘n mediakonferensie by die Sydney-krieketgronde gesê.
Hy het sy laaste toets vir Australië teen Suid-Afrika aan die einde van 2008 gespeel en sedertien met voet-, sy- én enkelbeserings gesukkel.
Lee, wat 5 paaltjies vir 47 lopies in sy debuut teen Indië by die Melbourne-krieketgronde geneem het, het gesê toetskrieket bly die toppunt van dié sport vir 'n speler.
Lee het gesê hy hoop om in vanjaar se Twintig20-Wêreldbeker in die Wes-Indies vir sy land te speel.
- Sport24
