Breier wis nie vooraf van Smith se bedanking
2010-08-19 06:47
Die Burger
Kaapstad - Graeme Smith se bedanking Woensdag as kaptein van die Suid-Afrikaanse Twintig20-krieketspan was só skielik dat dit selfs sy Protea-afrigter, Corrie van Zyl, onkant betrap het.
Van Zyl, wat vroeër vanjaar by Mickey Arthur oorgeneem het en tans saam met die land se naasbestes in Sri Lanka toer, het aan Die Burger gesê hy was “salig onbewus” van Krieket Suid-Afrika (KSA) se nuuskonferensie wat inderhaas gereël is óf enige voorneme van Smith om te bedank.
Dié 29-jarige aanvangskolwer het Woensdag aangekondig dat hy die tuig as blitskaptein neerlê en dat hy ook nie meer die eendaagse span sal aanvoer ná aanstaande jaar se Wêreldbeker-toernooi op die subkontinent nie. Dié toernooi in Indië, Sri Lanka en Bangladesj eindig vroeg in April.
Smith, wat in 2003 as 22-jarige die land se jongste kaptein tot nog toe geword het, sal egter steeds as toetskaptein aanbly.
“Ek worstel reeds geruime tyd met die idee om te bedank uit minstens een van die weergawes van die spel, maar dit was eers die afgelope week dat ek die besluit geneem het,” het Smith Woensdag gesê. “Vir agt van my nege jaar by die Proteas was ek kaptein en ek is verlig om nou uiteindelik minder verantwoordelikheid te hê.”
Volgens hom het hy dié nuus “so vertroulik as moontlik” probeer hou. “Ek het eers van 05:00 vanoggend (Woensdagoggend) van my familie en vriende laat weet sodat daar nie gerugte kon rondloop nie.
“Ek het ook SMS’e gestuur aan elk van my spanmaats en ek is seker Corrie het ook een gekry.”
Volgens Gerald Majola, uitvoerende hoof van KSA, sal die nasionale keurkomitee en die uitvoerende raad eersdaags oor Smith se opvolger besluit. AB de Villiers is die gunsteling om by hom oor te neem, hoewel die name van Hashim Amla, Johan Botha, JP Duminy en Alviro Petersen ook as opvolgers genoem word.
Bly op hoogte van al die jongste sportnuus deur Nuus24Sport op Twitter te volg