Boucher eerste met 500 vangskote

2011-11-09 15:24

Kaapstad – Die Suid-Afrikaanse paaltjiewagter Mark Boucher het Woensdag die eerste speler in die geskiedenis van toetskrieket geword om met 500 vangskote te kan spog.

Boucher het Phillip Hughes uitgevang van die boulwerk van die nuweling Vernon Philander om dié mylpaal op die eerste dag van die toets teen Australië op Sahara Park Nuweland te bereik.

Dié veteraan-paaltjiewagter het sy debuut vir Suid-Afrika in 1997 teen Pakistan gemaak en 75 agtereenvolgende toetse gespeel voordat hy in 2004 weggelaat is vir die toer na Indië.

Hy is in Januarie 2005 weer vir die reeks teen Engeland gekies.

Boucher speel Woensdag ook in sy 140ste toets.

Vir die jongste sportnuus volg Nuus24Sport op Twitter.

– Sport24