Botha blink uit vir Royals
2011-04-12 23:00
Jaipur- Shane Warne se Rajasthan Royals het Dinsdag hul tweede agtereenvolgende oorwinning in die Indiese Premierliga behaal deur die Delhi Daredevils met ses paaltjies te klop.
Die Royals moes ‘n taai wenteiken van 152 haal en het te danke aan goeie bydraes deur Rahul Dravid en Johan Botha die wenlopies geslaan met nog nege balle oor in die wedstryd.
Die gewoonlik rustige Dravid het ‘n haastige 38 van 31 balle aangeteken, terwyl Johan Botha se goeie spelpeil met die kolf voortgeduur het. Hy het ‘n onoorwonne 39 aangeteken.
Ross Taylor (18) het die wenlopies met ‘n ses en ‘n vier aangeteken in die voorlaaste boulbeurt.
Die legendariese Warne het vroeër met die bal uitgeblink. Hy het met syfers van 2/17 geëindig.
- Vir die jongste sportnuus, volg Nuus24Sport op Twitter
- SAPA