'Besluit kan Majola se doppie klink'
2011-07-22 07:02
Johannesburg – Krieket Suid-Afrika se besluit om sy reisagentskap in die pad te steek, kan sy grootbaas se doppie finaal klink.
Só is vandeesweek aan Sport24 gesê aan die vooraand van die bekendmaking van die langverwagte verslag oor die sogenaamde bonusskandaal wat dié beheerliggaam reeds die afgelope jaar lank treiter.
Gerald Majola, KSA se uitvoerende hoof, is eergister meer as vyf uur lank ondervra deur ouditeure van KPMG, wat vroeër vanjaar aangestel is om ondersoek in te stel na die toekenning van miljoene rande se ongemagtigde bonusse aan hom en sowat 40 ander werknemers.
Dié bonusse van R4,7 miljoen is verlede jaar betaal vir die aanbieding van die Indiese Premierliga (IPL) en die Kampioenetrofee-reeks, maar is nooit deur KSA se finansiële en besoldigingskomitee of die uitvoerende raad goedgekeur nie.
Hoewel Majola kort daarna vrygespreek is van enige ongerymdhede – ná ’n interne ondersoek onder leiding van KSA se vise-president, A.K. Khan – het die Johannesburgse hooggeregshof vroeër vanjaar gelas dat ’n onafhanklike ondersoek na KSA se geldsake gedoen word.
Dié span, wat die KPMG-ouditeure insluit en gelei word deur adv. Ishmael Semenya, moes die afgelope twee maande ook vasstel hoe R68 miljoen glo uit KSA se geldkoffer “verdwyn” het én waarom sowat R19 miljoen glo opgedok is vir reis- en-verblyf-koste tydens verlede jaar se Twintig20-wedstryd tussen die Proteas en Indië in die Moses Mabhida-stadion in Durban.
Majola sal na verwagting môre weer met dié ondersoekspan vergader om die laaste “uitstaande inligting” te verskaf voordat ’n volledige verslag Maandag aan KSA se ouditkomitee oorhandig word. Dit sal aanstaande Vrydag aan KSA se uitvoerende raad voorgelê word.
Hoewel daar verwag word dat dié verslag nie Majola se kop sal laat rol nie, het verskeie KSA-ingeligtes vandeesweek aan Volksblad gesê die besluit om Sandown Travel se dienste sonder waarskuwing te beëindig, kan wél sy einde beteken. Dié agentskap wil KSA hof toe sleep nadat sy kontrak laasmaand “summier beëindig” is – glo omdat hy inligting rondom Majola se reis-en-verblyfkoste aan die ondersoekspan verskaf en glo van dié inligting “aan ander belanghebbendes uitgelek het”.
Charlie Newell, Sandown Travel se besturende direkteur, het by navraag geweier om kommentaar te lewer. Tog verneem Volksblad ’n eis van nagenoeg R3 miljoen sal eersdaags teen KSA ingestel word.
“As uitvoerende hoof is Gerald by magte om hul (Sandown Travel se) kontrak te beëindig en hoef dit nie vooraf deur KSA se uitvoerende raad goedgekeur te word nie,” is deur ingeligtes aan Volksblad gesê. “As hy hom egter aan kontrakbreuk skuldig gemaak het, is hy in groot moeilikheid. KSA kan eenvoudig nie nog ’n skandaal bekostig nie.”
– Sport24
– Bly op hoogte van al die jongste sportnuus deur Nuus24Sport op Twitter te volg