Barnes moet ‘Ntini’s’ opspoor
2011-06-22 08:59
Kaapstad - Vind die nuwe geslag Makhaya Ntini’s.
Dít is die nuwe opdrag wat Krieket Suid-Afrika (KSA) aan Vincent Barnes gegee het.
Ná agt jaar as die hulpafrigter van die nasionale span, is Barnes vandeesweek aangestel as KSA se nuwe prestasie-afrigter.
Barnes sal ook die leisels neem van die Suid-Afrikaanse ontluikende span wat later vanjaar in Australië toer, sowel as van die nuwe, sewende span in die plaaslike Pro20-reeks.
Hy is ook aan die stuur van Suid-Afrika A, wat van volgende week af in ’n driehoekige toernooi in Zimbabwe teen Zimbabwe en Australië A speel.
Hy is veral die taak gegee om ’n oplossing te vind vir die vraagstuk waarom jong swart spelers wat uitblink op junior vlak, wegraak en nie vorder tot by die nasionale span nie.
“Ek gaan die net so wyd as moontlik span.
“Ek sal natuurlik kyk wat by die streekspanne gebeur, maar ek gaan seker maak dat ons ondersoek instel op alle vlakke van die spel,” het Barnes gesê.
Barnes (51) was sedert 2003 die Proteas se hulpafrigter, maar met die aanstelling van Russell Domingo en Allan Donald as Gary Kirsten se assistente, het Barnes se betrokkenheid by die nasionale span tot ’n einde gekom.
“Gerald (Majola, KSA se uitvoerende hoof) het ’n paar weke gelede vir my genoem dat Gary (Kirsten) sy eie span wou inbring.
“Hy het toe die moontlikheid geopper van ’n nuwe pos by die sentrum vir uitnemendheid,” het Barnes gister aan Sport24 gesê.
“Corrie (van Zyl, hoof van die sentrum vir uitnemendheid) het daarna baie met my gepraat en is baie opgewonde oor my nuwe verantwoordelikhede.”
“Ek is veral opgewonde oor die geleenthede om die ontluikende span en die nuwe sewende span af te rig.
“Dit gee my ’n kans om ook spanne af te rig, bo en behalwe die ontwikkelingswerk,” het die Kapenaar gesê.
Volgens Barnes moet hy toegee die kans om die leisels as ’n hoofafrigter te neem, was wel ’n versoeking.
“Ek het baie hard gedink oor die Bangladesj-pos. Ek het oor die laaste paar jaar dit al hoe moeiliker begin vind om so lank van die huis af weg te bly en as ek Bangladesj-pos sou aanvaar, sou dit nog meer tyd in hotelle beteken het.”
Barnes het gesê hy sien baie daarna uit om weer nou saam met Van Zyl te werk.
Vir die jongste sportnuus volg Nuus24Sport op Twitter.
- Sport24
