Aussies wil SA-kolwers mak maak

2012-11-08 11:10

Johannesburg – Australië se kaptein Michael Clarke het gesê Suid-Afrika se kolwers kan hul regmaak vir baie aggressie van sy boulers wanneer die eerste van drie toetse Vrydag in Brisbane begin, het RSG berig.

Hy sê kolwers soos Hashim Amla, Jacques Kallis, Graeme Smith en AB de Villiers kan verwag om met opslagballe gepeper te word.

Clarke meen met vier boulers wat balle teen vinniger as 140 km/h kan afstuur moet die Proteas verwag om heelwat kortballe te kry.

Die kaptein het tydens Donderdag se mediakonferensie bevestig dat Ricky Ponting van sy dyspierbesering herstel het en fiks verklaar is vir die toetsreeks.

Volgens AFP spog Australië met 'n uitstekende wenrekord by die Gabba in Brisbane.

Die laaste keer wat hulle op dié krieketveld verloor het was 24 jaar gelede in 1988 teen die Windies.

Hoewel ligte reën Donderdag oor Brisbane uitgesak het, word reën nie vir die toets voorspel nie.

Die kragmeting begin Vrydagoggend om 02:00 Suid-Afrikaanse tyd.

Vir die jongste sportnuus volg Nuus24Sport op Twitter.

– Sport24