Aussies se 'ware karakter' kom na vore
2011-11-22 08:11
Johannesburg – “Die ware karakter van hierdie span het na vore gekom en ons behoort almal só trots te wees op een van die merkwaardigste vertonings tot nog toe in Australiese krieket.”
Só het Michael Clarke, Australië se kaptein, gisteraand gesê nadat sy span die tweede toets hier teen Suid-Afrika met twee paaltjies gewen het.
Die Aussies die hoogste wentelling tot nog toe in toetskrieket op die Wanderers bereik (310) en Suid-Afrika daarvan weerhou om die eerste keer sedert hertoelating ’n tuisreeks teen Australië te wen.
Toe van die Aussie-joernaliste vir Clarke gevra het of hulle hom ’n verskoning skuld nadat hulle in die aanloop tot hierdie toets en selfs ná die eerste beurt die koppe van Ricky Ponting, Brad Haddin en Mitchell Johnson geëis het, het hy gesê: “Julle skuld niemand in die span ’n apologie nie. Daardie spelers het geweet daar is druk op hulle, maar soos die kampioene wat hulle is, het hulle toe dit regtig nodig was hul kant gebring.
“Ricky (62), Brad (55) en Mitch (40*) was absoluut skitterend en het op die wekroep geantwoord toe ons dit die nodigste gehad het.”
Die 18-jarige Pat Cummins, wat in sy debuuttoets as speler van die wedstryd aangewys is, het nie net sewe paaltjies in die toets (ses in die tweede beurt) geneem nie, maar ook die wenlopies met ’n grenshou van die boulwerk van Imran Tahir af geslaan.
“Vir my was daardie lopies (13*) wat ek saam met Mitch gekry het, omtrent van meer belang as die paaltjies,” het Cummins breed geglimlag.
Clarke, wat vir slegs twee lopies deur Vernon Philander geboul is, het gesê hy het toe sy span 190 vir ’n sege benodig het, elke lopie begin aftel.
“Dit was baie senutergend en ek het omtrent ’n uur en ’n half in die badkamer deurgebring omdat ek soms nie eens kon waag om te kyk wat aangaan nie,” het hy erken.
Oor die puik vennootskap van 72 lopies tussen Haddin en Johnson het hy gesê toe hulle afgekom het met teetyd, wou hul spanmaats aan hulle raad gee.
“Ek het vir hulle gesê ons moet nie eers ons asems mors nie, want hulle gaan in elk geval net speel soos wat hulle gewoond is.”
Clarke het gesê hy was baie bekommerd dat gisteroggend se reën die heeldag sou aanhou.
Wat die moontlike aanstelling van Mickey Arthur as nuwe Aussie-afrigter betref, het Clarke gesê dit sal hom glad nie pla as ’n Suid-Afrikaner hul afrigter word nie.
Daar word wyd bespiegel dat Clarke sy steun toegesê het aan sy landgenoot en oud-toetsspeler Steve Rixon om die span te brei.
– Vir die jongste sportnuus volg Nuus24Sport op Twitter.
– Sport24