Aussies baljaar in Adelaide

2012-11-22 11:00

Adelaide – Australië se krieketkaptein, Michael Clarke, het Donderdag die eerste speler in die geskiedenis geword om vier dubbele honderdtalle in 'n jaar aan te teken.

Clarke (224*), David Warner (119) en Mike Hussey (103) het behoorlik onder Suid-Afrika se boulers ingeklim ná die etenspouse op die eerste dag van die tweede toets in Adelaide, het Beeld berig.

Met die aanbreek van die teepouse het die tuisspan reeds 280/4 op die telbord gehad en teen uitskeityd is die telling 482/5 ná 86.5 boulbeurte.

Suid-Afrika het die eerste drie paaltjies vinnig platgetrek met Jacques Kallis wat Ed Cowan (10) en Ricky Ponting (4) uitgeboul het, voordat hy die veld met 'n dyspierbesering moes verlaat.

Morné Morkel het Ed Quiney vir 'n nulletjie uitgehaal en die tuisspan, wat die loot gewen het en besluit het om eerste te kolf, was op 55/3 in die moeilikheid.

Warner en Clarke het egter vasgeskop en ná die etenspouse die boulaanval begin straf.

Hul vennootskap het 155 lopies beloop voordat Morkel weer sukses behaal het deur Warner uit te haal.

Die aanslag op die SA boulaanval het egter voortgeduur en selfs momentum gekry nadat Hussey hom by Clarke aangesluit het.

Die snelbouler Vernon Philander moes kort voor die aanvang van die toets weens 'n seer rug onttrek en is deur Rory Kleinveldt in die span vervang.

Kliek hier vir die volledige telbord.

Vir die jongste sportnuus volg Nuus24Sport op Twitter.

- Sapa - AFP