Aus veg terug vir T20-wen
2010-02-06 04:03
Melbourne – Die Australiese krieketspan het teruggeveg om Pakistan met twee lopies in hul enigste Twintig20-wedstryd op die Melbourne krieketgronde te wen.
Pakistan het die teiken wat Australië opgestel het met selfvertroue gejaag, alhoewel hulle twee paaltjies kort na mekaar verloor het.
Kamran Akmal en sy broer Umar was die kolwers wat uitgeblink het en was stewig in beheer om hul span binne 29 lopies van 'n oorwinning te bring.
Kamran het selfs sy derde vyftigtal in ‘n T20-wedstryd aangeteken maar is op 63 lopies deur Shaun Tait uitgeboul.
Die Kamran-paaltjie was ook die keerpunt van die wedstryd en die Aussie Steve Smith het dié geleentheid gebruik om twee vinnige paaltjies met sy debuut te neem.
Nadat Pakistan net 10 lopies van die laaste beurt vir ‘n oorwinning benodig het, is Umar Akmal op die eerste aflewering uitgehaal en die laaste twee kolwers kon net 7 lopies aanteken.
- Sport24