Aus se Quiney wil weer toetskrieket proe

2012-11-17 13:15

Sydney – Die toporde-kolwer Rob Quiney is desperaat om weer toetskrieket te speel en is gereed om dit te doen indien Shane Watson nie volgende week teen Suid-Afrika kan speel nie.

Quiney het sy buiging gemaak in verlede week se onbesliste eerste toets in Brisbane, en is as plaasvervanger vir Watson aangewys indien dié veelsydige speler nie van 'n kuitbesering herstel nie.

Die 30-jarige Quiney het slegs nege lopies aangeteken op die Gabba voor hy deur Dale Steyn op die grens uitgevang is.

Mickey Arthur, afrigter van die Australiese span, het gegrap en gesê dit was die "beste nege [lopies]" wat hy nog ooit gesien het, en dat Quiney baie gemaklik gelyk het.

Die kolwer was egter teleurgesteld in sy vertoning.

Watson sal vroeg volgende week 'n fiksheidstoets ondergaan en sy teenwoordigheid sal definitief Australië se toporde versterk.

"Dit gaan baie voordelig wees vir die span indien hy kan kolf en boul. Dit is 'n belangrike reeks, veral omdat die eerste wedstryd onbeslis geëindig het," het Quiney gesê.

Die tweede toets op die Adelaide Oval begin Donderdag en die reeks sluit af op die Waca in Perth vanaf 30 November tot 4 Desember.

– Volg Nuus24Sport op Twitter

- Reuters