Aus-krieketspeler geskors oor skade aan kleedkamers

2012-11-20 16:12

Adelaide – Die veelsydige Australiese krieketspeler Dan Christian is geskors omdat hy verskeie kere nadat hy in wedstryde uitgeboul is, kleedkamers beskadig het, het spanbeamptes Dinsdag gesê.

Die Suid-Australiese krieketvereniging (Saca) het gesê Christian is vir een wedstryd geskors nadat hy reeds drie keer die seisoen kleedkamers beskadig het.

Christian (29) is egter ingelig dat sy skorsing nie krieketkeurders sal verhoed om hom in die toekoms vir die nasionale span te kies nie.

"Hulle [die keurders] het gesê dit sal nie 'n invloed hê op sy kanse om in die toekoms gekies te word nie," het Saca se direkteur van krieket, Jamie Cox, gesê.

Christian het Australië reeds in 17 eendag- en 11 twintig20-wedstryde verteenwoordig.

"Hy is 'n emosionele ou en daai emosie werk by tye regtig goed vir hom op die veld, maar dit is geen verskoning om eiendom te beskadig nie," het Cox bygevoeg.

Volg Nuus24Sport op Twitter.

- Sapa - AFP