Arthur oorweeg om Aussies te brei, maar ...
2011-08-23 07:05
Bloemfontein – Die voormalige Suid-Afrikaanse afrigter Mickey Arthur word beskou as die ideale breier om Australië terug op koers kry.
Die huidige Australiese afrigter Tim Nielsen het die Aussie-indaba oor krieketsake wat na hul treurmare teen Engeland aangevra is, nie oorleef nie
Nielsen mag heraansoek doen vir dié pos, maar daar word nou gesê Australië moet soos Indië en Engeland ’n afrigter van Afrika oorweeg om weer die voorste span ter wêreld te word.
Die Herald Sun berig Indië het met Gary Kirsten as afriger gedy, terwyl Engeland die nommereen-posisie by Indië onder Andy Flower oorgeneem het.
Die Aussies het nog nooit ’n buitelandse breier gehad nie.
Die 43-jarige Arthur, Suid-Afrika se suksesvolste afrigter nog, het aan Sport24 gesê daar lê inderdaad interessante tye voor, maar dat daar nog baie water in die see moet loop.
“Ek sal dwaas wees om nie na ’n opsie soos dit te kyk nie.
“My fokus is op die oomblik nog vierkant by die Wes-Australië-pos wat ek terdeë geniet.
“Ek het baie veranderinge hier gemaak wat ek graag nog wil deursien,” het Arthur gesê.
Sommige is van mening Arthur moet die pos op die interim oorweeg.
Australië se volgende toer is hoeka na Suid-Afrika en daar is niemand wat meer vertroud met die Proteas en die plaaslike toestande is nie.
Die Aussies gaan in Oktober en November twee blitswedstryde, drie eendagwedstryde en twee toetse teen Suid-Afrika speel.
Arthur is in 2005 as Suid-Afrika se afrigter aangestel. Hy het verlede jaar weens verskille tussen hom en Krieket Suid-Afrika uit die bloute bedank.
Die Proteas het onder hom die eerste keer in 40 jaar in ’n toetsreeks in Engeland geseëvier waarna hulle ook vir die eerstekeer met die Aussies in Australië in ’n toetsreeks afgereken het.
– Sport24
– Bly op hoogte van al die jongste sportnuus deur Nuus24Sport op Twitter te volg