Amla en Kallis klim ranglys
2010-02-11 05:36
Nagpur - Suid-Afrika se Hashim Amla tel nou amptelik tussen die elite van internasionale kolwers nadat die Internasionale Krieketraad gister sy nuutste ranglyste uitgereik het.
Dié regskolwer van die Proteas het danksy sy onoorwonne 253 in Nagpur 13 plekke op die ranglys vir kolwers geklim en beklee nou vir die eerste keer in sy loopbaan ’n plek in die top-tien op dié ranglys. Hy is nr. 10 op die lys.
Jacques Kallis, wat ’n reuse-vennootskap van 340 met Amla in die eerste toets gedeel het, is beloon vir sy 173 lopies in die Proteas se beurt en het met vier plekke geklim tot nr. 4 op die lys.
Graeme Smith, kaptein en aanvangskolwer van die Proteas, het egter drie plekke geval en is nou net onder Kallis op die lys.
Dale Steyn se wedstrydontleding van 10/108 in die toets het beteken dat hy nou ’n reuse-gaping tussen hom en die res van die boulers op die ranglys bewerkstellig het.
Dié Proteas-blits is bo-aan die lys met 891 punte en die Australiër Mitchell Johnson (780) ver agter in die tweede plek.
Om Steyn se oorheersing te illustreer: daar is slegs 17 punte wat die voorste kolwer op die ranglys, Gautam Gambhir (840 punte), en Smith op nr. 5 (823) skei.
Daarteenoor is Steyn ’n allemintige 159 punte voor Graeme Swann, wat die vyfde plek op die boulranglys beklee.
Steyn het ook net ses punte minder as sy hoogste puntetotaal ooit op die ranglys. Hy was op 897 ná sy uitstekende vertoning in die Ahmedabad-toets in 2008.
Paul Harris is ook beloon vir sy uitstekende boulvertoning in die Proteas se tweede beurt.
Hy het van nr. 12 tot nr. 9 op die ranglys geklim.
- Sport24
- Beeld