Amla, Peterson uit laaste eendagstryd teen Kiwi's

2013-01-23 09:20

Kaapstad – Hashim Amla en Robin Peterson is aan die derde en laaste eendagwedstryd teen Nieu-Seeland, wat Vrydag op Senwespark in Potchefstroom plaasvind, onttrek.

Amla het sy bobeenspier tydens 'n oefensessie beseer terwyl Peterson steke aan sy regterhand moes kry tydens Dinsdag se tweede eendagkragmeting in Kimberley.

"Hashim is uit die eendagspan onttrek omdat ons voel dat dit 'n 50-50-besluit sal wees om hom te laat speel en ons wil geen kanse waag nie, aangesien die toets teen Pakistan volgende week begin," het die Proteas se spandokter, Mohammed Moosajee, Woensdag gesê.

Nieu-Seeland het die eendagreeks teen Suid-Afrika beklink deur die eerste twee kragmetings in die Paarl en Kimberley te wen.

Vir die jongste sportnuus volg Nuus24Sport op Twitter.

– Sport24