Amla, Kallis stewig in die saal in Brisbane

2012-11-09 09:28

Brisbane – Die Proteas is stewig in beheer op dag een van die eerste toets teen Australië in Brisbane ná spel op 255 vir die verlies van twee paaltjies gesluit het.

Hashim Amla (90*) en Jacques Kallis (84*) is die twee spelers wat Saterdag sal voortkolf na die eerste dag kortgeknip is as gevolg van swak lig.

Amla het gewys hoekom hy die wêreld se top-kolwer is toe hy sy 24ste vyftigtal met gemak behaal het.

Graeme Smith se paaltjie het geval toe James Pattinson hom in die 11de boubeurt been-voor-paaltjie betrap het. Smith kon net 10 lopies aanteken.

Amla het by Alviro Petersen aangesluit en die twee het 90 lopies om die tweede paaltjie aangeteken voordat Petersen ‘n aflewering van Nathan Lyon in Mike Hussey se hande geslaan het.

Petersen het 67 lopies aangeteken.

Hierna kon die Australiese boulers amper geen weerstand bied teen Amla en Kallis nie.

Die Proteas, wat die wêreld se voorste toetsspan geword het ná 'n indrukwekkende reekssege in Engeland vanjaar, mik vir 'n herhaling van hul historiese reekssege van vier jaar gelede in Australië.

– Vir die jongste sportnuus volg Nuus24Sport op Twitter.
 

- Reuters