Albie is terug – en hy gaan vir sy plek veg
2011-12-11 10:00
Johannesburg – Albie Morkel is uiteindelik skeet-vry en het reeds een oog op ’n plek in die Suid-Afrikaanse groep vir die reeks van vyf kitswedstryde teen Sri Lanka.
Morkel (30) moes in Oktober weens ’n maagspierbesering onttrek word aan die Protea-groep vir die twee Twintig20-wedstryde teen Australië, wat met 1-1 gelykop geëindig het.
Dié veelsydige Pretorianer, wat Suid-Afrika reeds in ’n toets, 51 kits- en 31 Twintig20-wedstryde verteenwoordig het, is daarna boonop op die krukkelys gedwing met ’n ontsteekte blindederm.
Sy afwesigheid was ’n gevoelige slag vir die Titans in hul veldtog in die plaaslike eendagbeker-kompetisie, waarin dié span tweede laaste geëindig het nadat hy net drie van sy 10 kragmetings kon wen.
“Dit was teleurstellend om vir so lank nie te kon speel nie, maar ek het net meer as 10 dae gelede weer begin oefen en alles voel heel goed,” het Morkel vandeesweek aan Sport24 gesê.
Hy het vroeër vanjaar in onguns met Andrew Hudson en sy mede-keurders verval, kort voor die Wêreldbekertoernooi in Indië, Sri Lanka en Bangladesj.
Morkel se plek in die kolflys is deur sy Titans-spanmaat Francois du Plessis ingeneem, maar die Suid-Afrikaners is in die kwarteindronde uitgeskakel ná ’n powere kolfvertoning teen Nieu-Seeland.
Hulle het daarna boonop die kitsreeks teen die Aussies met 1-2 verloor.
Volgens Morkel behoort hy vandeesweek speelkans te kry in die Titans se SuperSport-wedstryd teen die Knights in Bloemfontein.
Dié span is tans ’n kortkop agter die Vrystaters, wat die eerste plek op die punteleer van dié meerdaagse reeks beklee.
“Natuurlik wil ek baie graag weer die nasionale span haal, maar ek besef ek sal myself eers moet bewys,” het Morkel gesê.
“Ek het darem ’n paar SuperSport-wedstryde om weer op dreef te kom – en hopelik kan ek die keurders genoeg beïndruk.”
* Die Proteas pak Sri Lanka, wat in April die knie gebuig het in die Wêreldbeker-eindstryd teen Indië, op 11 Januarie in die Paarl in die eerste van vyf kitswedstryde.
– Sport24
– Bly op hoogte van al die jongste sportnuus deur Nuus24Sport op Twitter te volg