Albie glimlag weer breed
2012-01-09 07:00
Benoni – Ná ’n misrabele krieketjaar waarin hy uit die Wêreldbekergroep gelaat is, met beserings en sy spelpeil gesukkel het en sy blindederm verwyder is, kon die nuwe krieketjaar nie beter vir Albie Morkel begin het nie.
Nie net het hy die afgelope paar dae hier op Willowmoorepark met die kolf én bal geskitter vir die Titans teen die Warriors nie, maar hy is gister ook in die Suid-Afrikaanse eendaggroep ingesluit as plaasvervanger vir die beseerde Dean Elgar.
“Dit het baie vasbyt gekos,” het Morkel Sondag erken oor al die terugslae.
“Maar ek het besluit om maar net te volhard en te sien wat gebeur. Dit is wonderlik om nou weer terug in die nasionale groep te wees en jy kan maar net alles gee om die kans wat jy kry te gebruik,” het hy gesê.
Vir sy eertydse huismaat, AB de Villiers, gaan hierdie ook ’n baie spesiale reeks teen die Sri Lankane wees.
Hy voer Suid-Afrika die eerste keer aan en glo ’n opwindende era wag op SA krieket.
Hy sal ongetwyfeld sy eie stempel op die span wil afdruk en sy aggressiewe benadering en geesdrif sal ook in sy kapteinskap wys.
Sri Lanka is in eendagkrieket ’n perd van ’n ander kleur as in toetskrieket.
Daarom kan De Villiers-hulle verwag die besoekers gaan hul spiere veel meer bult in die kitsreeks van vyf wedstryde wat Woensdag in die Paarl afskop.
Die Sri Lankane gaan in die eerste plek veel meer plofkrag in hul boulaanval hê as die poeierkwas-snellers waarmee hulle in die toetse gespeel het.
Die hoofrede hiervoor is dat die mopkop met die slingeraksie, Lasith Malinga, wat plesier daaruit put om kolwers se tone te breek met sy streepballe, in die eendagspan is.
Daar kan geen twyfel wees nie dat hy die eendagbouler ter wêreld is wat kolwers die meeste vrees.
Met dié dat hy ook nie meer toetskrieket speel nie, sal hy uitgehonger wees om die Suid-Afrikaanse kolwers van sy unieke medisyne te laat proe.
Dit bly steeds een van die groot raaisels hoe hy met sy slingeraksie dit regkry om só akkuraat te wees met sy streepballe, wat hy na willekeur afstuur teen ’n hoë spoed.
Die spanne is:
Suid-Afrika (uit): AB de Villiers (k), Hashim Amla, Johan Botha, JP Duminy, Faf du Plessis, Albie Morkel, Jacques Kallis, Rory Kleinveldt, Morné Morkel, Wayne Parnell, Robin Peterson, Graeme Smith, Dale Steyn, Lonwabo Tsotsobe.
Sri Lanka (uit): Tillakaratne Dilshan (k), Angelo Mathews, Upul Tharanga, Kumar Sangakkara, Mahela Jayawardene, Dinesh Chandimal, Kosala Kulasekara, Thisara Perera, Lasith Malinga, Nuwan Kulasekara, Ajantha Mendis, Rangana Herath, Dhammika Prasad, Dilhara Fernando, Lahiru Thirimanne.
– Sport24
– Bly op hoogte van al die jongste sportnuus deur Nuus24Sport op Twitter te volg