Aikôna, sê Mickey oor mediajag op Ricky
2011-12-14 13:30
HOBART. – Die Australiese krieketspan is gister deur dié land se media behoorlik oor die kole gehaal ná sy “vernederende” nederlaag met 7 lopies teen Nieu-Seeland.
“Lowest of the Low,” het die Sydney Daily Telegraph se opskrif oor die tweede toets uitbasuin.
Nieu-Seeland het Maandag sy eerste toetsoorwinning in 26 jaar op Australiese bodem behaal ná ’n dramatiese kolfineenstorting hier deur die Aussies in hul tweede beurt.
Dit word deur sommige kenners selfs as Australië se vernederendste nederlaag in die geskiedenis van toetskrieket beskou.
Die Sydney Morning Herald het gefokus op die eens magtige Aussies se swak spelpeil.
“Hulle was die konings van wêreldkrieket, maar Australië het nie meer die vermoë om Nieu-Seeland (agtste op die wêreldranglys) te klop nie.”
Veral die kolwers is erg gekritiseer nadat hulle ’n gunstige wedstrydsituasie op die vierde dag ongedaan gemaak het.
Michael Clarke en Michael Hussey is albei vir nulletjies uitgehaal en Ricky Ponting, wat onder reuse-druk verkeer om sy plek in die span te behou, kon slegs 16 lopies aanteken.
“Dis hartseer en dit raak nou belaglik,” het Robert Craddock in die Telegraph oor die stand van Aussie-krieket geskryf.
“As die nuwe voorsitter van die keurders, John Inverarity, nie dapper genoeg is om Ponting se loopbaan te beëindig nie, moet hy self bedank..”
Die aanvangskolwer Phil Hughes se kop word ook geëis nadat hy slegs 24 lopies in twee kolfbeurte kon aanteken.
Die nuwe Australiese afrigter, Mickey Arthur, wat Suid-Afrika met groot sukses teen die einste Aussies afgerig het, het vir sy spelers in die bres getree.
Arthur het sy steun aan Ponting en Hussey toegesê en glo hulle moet hul plek in die span behou vir die eerste toets teen Indië wat tussen Kersfees en Nuwejaar in Melbourne beslis word.
Volgens Arthur is daar geen planne om Ponting en Hussey se uittrede uit internasionale krieket te “bestuur” nie.
Hoewel Ponting en Hussey ’n erge lopiedroogte beleef, het Arthur gesê hul ervaring is van kardinale belang in die oorgang van die Australiese span.
“Hulle het nog groot rolle om te speel, want ons kort ervaring in ons middelorde.”
Die prentjie lyk egter nie baie rooskleurig vir Hughes nie.
– Bly op hoogte van al die jongste sportnuus deur Nuus24Sport op Twitter te volg
- Sapa - AP