AB glo daar’s ’n vars briesie
2012-01-13 06:51
Kaapstad. – Die Proteas gaan nie nou ná een oorwinning meegevoer raak nie.
AB de Villiers, die nuwe Suid-Afrikaanse eendagkaptein, het gesê dit maak nie saak hoe voortreflik hul oorwinning in die eerste krieketwedstryd in die Paarl was nie, die spelers besef dit is net één vertoning.
“Ek het die spel nou al lank genoeg gespeel om te weet dat jy nie opgewonde moet raak oor een vertoning nie.
Dit was ’n fantastiese span-vertoning (Woensdag teen Sri Lanka) en ek is opgewonde daaroor, maar dit bly steeds net een vertoning,” het De Villiers ná die wedstryd in die Paarl gesê.
Die volgende wedstryd in die reeks van vyf word Saterdag in Oos-Londen gespeel.
Die Proteas het Sri Lanka met ’n allemintige 258 lopies geklop, nadat die besoekers vir net 43 uitgeboul is.
Suid-Afrika was egter die laaste jaar of wat verskriklik wisselvallig – en dit sal nie die eerste keer wees nie dat hulle ’n briljante vertoning met ’n vrot een opvolg.
Tillakaratne Dilshan, die Sri Lankaanse kaptein, het juis gesê die manier waarop sy span die tweede toets in Durban gewen het ná die hengse pak slae in die eerste toets in Centurion sal sy spelers aanmoedig.
“Dit is beslis iets wat ons sal gebruik om ons te motiveer.
“Ons is ’n baie wisselvallige span, maar ons het gewys dat ons swak vertonings met goeies kan opvolg,” het Dilshan gesê.
De Villiers meen ’n mens moenie toets- met eendagkrieket vergelyk nie.
Sri Lanka sal met rasse skrede moet verbeter as hy die Proteas in die res van die reeks wil pla.
Die kolwers het glad nie opgewasse gelyk nie en die Proteas, veral Morné Morkel se kort aflewerings, was een te veel vir hulle.
Morkel het dié seisoen stadig begin, maar hy boul weer soos van ouds.
Dié hemelbesem het goed geboul in die laaste toets op Nuweland sonder veel sukses, maar hy was eergister op ’n mak blad amper onspeelbaar.
Die naatboul-aanval van Morkel, Lonwabo Tsotsobe en Dale Steyn lyk baie gedug en behoort vir ’n paar jaar die basis van die Protea-aanval te vorm.
Die kolflys lyk ook meer standvastig met Hashim Amla, Jacques Kallis en De Villiers wat in enige span in wêreldkrieket sal kan instap.
Die één groot bekommernis bly die spelpeil van die aanvangskolwer Graeme Smith.
Hy kolf deesdae met bitter min selfvertroue en die keurders sal binnekort ’n besluit moet neem of Smith die langtermyn-opsie vir die eendagspan is.
Sy rekord in toetskrieket was nog altyd beter as in kitskrieket en ’n mens kan dit regtig sien as jy hom met sy aanvangsmaat, Hashim Amla, vergelyk.
– Sport24
– Bly op hoogte van al die jongste sportnuus deur Nuus24Sport op Twitter te volg