10 uit 10!
2011-12-18 08:11
Centurion – Bel die Verenigde Nasies, Dokters Sonder Grense en Amnestie Internasionaal – want wat Vernon Philander en sy tien Protea-spanmaats Saterdag hier aan die Sri Lankaanse krieketspan gedoen het, grens aan die onmenslike.
Nóg ’n vyftal van paaltjies – die vierde van dié Kaapse naatbouler se kort toetsloopbaan – het die besoekers vir net 150 in hul tweede beurt help stoomroller en aan die Suid-Afrikaners ’n sege met ’n beurt en 81 lopies besorg.
Dít in twee-en-’n-bietjie dae.
As Philander met 5/53 in Sri Lanka se ewe patetiese eerste beurt van 180 ’n verskrikking was, was sy 5/49 Saterdag selfs meer vreesaanjaend.
Hy het nou reeds ’n verstommende 24 slagoffers geëis in net sy eerste drie toetse.
Hy het Saterdag net die 16de Suid-Afrikaanse bouler geword wat tien paaltjies in dieselfde toets kon laat kantel.
En hy het wéér sy veel meer geroemde snelvennote – Dale Steyn, Morné Morkel en Jacques Kallis – oorskadu.
Vroeër het Mark Boucher (65 lopies, 101 balle, 10x4) en Imran Tahir (29*, 33 b, 5x4) die Suid-Afrikaners se oornagtelling met 22 lopies laat vorder na 411, om aan die Sri Lankane ’n yslike agterstand van 231 te besorg.
Philander het daarna in net sy tweede boulbeurt toegeslaan deur hul kaptein, Tillakaratne Dilshan (6, 9 b, 1x4) agter die paaltjies deur Boucher te laat uitvang – die eerste van ses vangkanse vir die Protea-paaltjiewagter.
Nadat Steyn (2/36) vir Tharanga Paranavitana (4, 21 b, 1x4) laat terugstap het, was dié Ravensmead-boorling weer aan die beurt – dié keer met die gesogte paaltjie van Kumar Sangakkara (2, 8 b).
Mahela Jayawardene (15, 31 b, 3x4) is oomblikke later op skitterende wyse deur Kallis uitgeloop om die besoekers op 37/4 te laat steier, voordat Thilan Samaraweera (32, 54 b, 6x4) en Angelo Mathews (5, 17 b, 1x4) 29 lopies om die vyfde paaltjie behaal het.
Dié verweer is kort ná die middagete ook deur die Philander-Boucher-kombinasie kortgeknip, waarna Morkel (1/36) vir die eerste keer in dié kragmeting toegeslaan het.
Met die telling op 70/6 (en die laaste sweempie trots lankal reeds begrawe) het die Sri Lankaanse kolfstert vrypas gehad om die langsteel in te lê – maar ’n paar swierige sesse het bloot die onvermydelike uitgestel.
Steyn het vir Thisara Perera (21, 27 b, 1x4, 1x6) onskadelik gestel en Tahir het Kaushal Silva (17, 45 b, 1x4) se einde beteken, voordat Philander die uitklophou geplant het met die paaltjies van Chanaka Welegedara (10, 8 b, 1x4, 1x6) en Rangana Herath (23, 18 b, 2x4, 2x6).
- Rapport