SA blaser het laaste sê oor toets
2010-07-29 08:01
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Bloemfontein - “Dit plaas nie meer druk op hom nie.”
Só het Saru se skeidsregterbaas, André Watson, gereageer oor die moeilike taak wat vandag op een van sy fluitjieblasers, Craig Joubert, se skouers rus.
Met skeidsregters wat vanjaar meer as gebruiklik om die verkeerde redes in die kollig in die Drienasies-reeks is, moet Joubert ná die afgelope week se mediastorm oor die speeloppervlak van die Etihad-stadion in Melbourne besluit of Saterdag se Drienasies-wedstryd tussen die rugbyspanne van die All Blacks en Wallabies daarop gespeel kan word.
“Craig sal besluit of dit gevaarlik is of nie. Dit is gebruik dat skeidsregters dit doen,” sê Watson.
Suid-Afrika se Joubert sal die speeloppervlak vandag bekyk en daarna sy aanbeveling aan die Internasionale Rugbyraad (IRR) se bestuurder van skeidsregters, Paddy O’Brien, maak.
Joubert het volgens allblacks.com reeds sy kommer teenoor O’Brien uitgespreek.
Daar is vandeesweek berig dat die All Blacks en die Wallabies beserings kan opdoen op ’n veld wat as “onstabiel” deur die klubs van die Australiese Voetballiga (AFL) en AFL-spelersvereniging beskou word.
Joubert het O’Brien dadelik ná sy aankoms in Melbourne oor die speeloppervlak geskakel, hoewel die spanbesture van die All Blacks en die Wallabies gister aangedui het dat die toets kan voortgaan.
Die Suid-Afrikaner sal nietemin vandag die laaste sê hê.