Pocock-hulle skielik nie meer so in kollig
2010-09-01 10:07
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Bloemfontein - Die Springbokke kan ook aanpas.
Én die rugbyspan het dit reeds gedoen sonder dat ’n haan daarna gekraai het.
Peter de Villiers, Bok-breier, se span is vroeër vanjaar in die Drienasies-reeks gekritiseer omdat hy skielik ná ’n suksesvolle Super14-reeks vir Suid-Afrikaanse spanne by die afbreekpunte kleigetrap het.
In verlede Saterdag se sege van 44-31 oor Australië in Pretoria was daar byna geen teken van die Wallaby-flank David Pocock se balstelery nie.
Daarom behoort dit ook nie Saterdag hier op Vodacompark teen die Aussies ’n probleem te wees nie.
Die All Blacks en Wallabies was in die Bokke se wegwedstryde baas op die grond en daar is gewonder waarom hulle nie op internasionale vlak by die nuwe toepassing van die reëls kon aanpas nie.
Pocock en die Kiwi-flank Richie McCaw het soos die Bokke se beseerde Heinrich Brüssow besit omgekeer wat hul teenstanders raadop gehad het.
Baie mense het toe gemeen dat die Bokke nie sonder Brüssow weer op die grond sal kan meeding nie. ’n Fikse Brüssow hoort beslis in die Bok-kamp, maar tog lyk dit of die Bokke se teenstanders nie meer soveel in dié afdeling oorheers nie.
Of die terugkeer van die flank Juan Smith vir die tuistoetse die deurslag gegee het, kan ’n mens maar net wonder.
Smith speel weer ’n barshou en sy gevestigde kombinasie met die agtsteman Pierre Spies en flank Schalk Burger is dalk net genoeg om teenstanders te ontsenu.
Tog meen De Villiers sy span is nou beter toegerus vir die stryd op die grond.
“Ek dink ons het oorsee aan die begin van die Drienasies gesukkel om aan te pas by die manier waarop die reëls by die afbreekpunte toegepas is.
“Dit was heeltemal verskillend as waaraan ons in die Super14-reeks gewoond was en ons het ’n tydjie gevat om daarby aan te pas. Noudat ons aangepas het, gaan dit beter,” sê hy.
Hoewel die Bokke in Pretoria veral in die lynstane goed vertoon het, is die afbreekpunte volgens die slot Victor Matfield die afdeling waar hy en sy spanmaats die meeste verbeter het.
Hy meen dit het ’n groot bydrae in die Bokke se eerste Drienasies-sege van 2010 op Loftus Versfeld gehad.
“Die lynstane was in Pretoria baie beter, maar ek was veral beïndruk met hoe goed ons by die afbreekpunte gedoen het.”
Matfield meen dié verbetering kan aan ’n spanpoging toegeskryf word.
Bly op hoogte van al die jongste sportnuus deur Nuus24Sport op Twitter te volg.
- Sport24