Oud-Bok se aandele styg by Aussies
2010-09-01 08:56
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Durban - Die voormalige Springbok-losskakel Braam van Straaten kan die Wallabies straks tot aanstaande jaar se Wêreldbeker-toernooi as skopafrigter bystaan.
Van Straaten het die Australiese rugbyspan se stelskoppers verlede week voor die Drienasies-toets teen die Springbokke op Loftus Versfeld help skaaf.
Hy het hom gister weer in Umhlanga by die span aangesluit en sal tot môre met die skoppers werk. Daar is nou belangstelling om hom op lang termyn met die slyp van die span te betrek.
Volgens Van Straaten het die geleentheid ontstaan nadat hy self die inisiatief geneem het om deur ’n tussenganger met die Wallabies kontak te maak. “Ek en Pat Howard (’n voormalige Wallaby-senter) is redelik goeie vriende en het deur hom die kontak gemaak om te sê dat ek hulle graag sal wil help.”
Van Straaten het toe op die Wallaby-breier, Robbie Deans, se uitnodiging met Berrick Barnes, Quade Cooper, Kurtley Beale, Anthony Faingaa en Matt Giteau gewerk.
“Ek het baie goeie terugvoering ontvang. Die skoppers het in die drie dae wat ek met hulle gewerk het, baie verbeter,” het Van Straaten gesê.
Hy het ook bevestig dat die Aussies belangstel om tot ná volgende jaar se WB-toernooi in Nieu-Seeland van sy dienste gebruik te maak.
Sy volgende stap ná die Drienasies-reeks sal wees om ander aspekte van die Aussies se skopwerk te verfyn.
“Ons het tot dusver nog net aan die skopwerk pale toe gewerk, maar Robbie Deans wil hê ek moet in Oktober vir 10 dae Sydney toe kom sodat ons ook aan die skoppe uit die hand aandag kan skenk,” het Van Straaten gesê.
Die voormalige puntemasjien is nou nog vyfde op die lys van voorste puntemakers in Bok-rugby.
Hy bedryf saam met Louis Koen ’n skop-akademie en beskou dit nie as ’n etiese probleem om die Aussies by te staan nie.
“Dit is ’n professionele stap. Dis nie elke dag dat jy die kans kry om met ’n internasionale span te werk nie. Dis ’n kans om my intellektuele kapitaal te deel en ook daarvoor vergoed te word,” het hy gesê.
“Eddie Jones het sy betrokkenheid by die Springbokke in dieselfde lig gesien.
“Ek sal altyd beskikbaar wees om die Bokke te help indien dit verlang word. Ek wil die kans met Australië met albei hande aangryp.”
Van Straaten sê sy agtergrond in die onderwys maak dit vir hom maklik om sy kennis oor te dra.
“Wat ek in 35 jaar oor skopwerk geleer het, kan ek vir enigiemand in 5 dae leer.”
Bly op hoogte van al die jongste sportnuus deur Nuus24Sport op Twitter te volg.
- Sport24