Oud-Bok help Wallabies skop
2010-08-26 11:08
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Kaapstad – Australië het die hulp van 'n oud-Bok ingeroep om die Wallabies met hul stelskopwerk te help voor hul Drienasies-toets Saterdag teen Suid-Afrika in Pretoria.
Braam van Straaten het in 21 toetse vir die Springbokke gespeel en word die beste onthou vir SA se oorwinning oor die All Blacks in 2000 in Johannesburg, toe hy sewe skoppe deur die pale gejaag het.
By die Wallabies se eerste oefensessie Maandag in Kaapstad, het van Straaten aan die einde van die oefening vir James O'Connor, Matt Giteau en Quade Cooper met hul stelskopwerk gehelp.
Hy het die Aussies ook Dinsdag, wat 'n rusdag vir die span was, verder help skaaf aan hul skoptegnieke.
Behalwe om hul stelskopwerk te verbeter, is die Australiërs ook gretig om die fiksste span in wêreldrugby te word.
Hulle is deeglik bewus dat die All Blacks twee drieë in die laaste drie minute van verlede naweek se toets teen die Bokke kon druk om die kragmeting te wen.
Afskoptyd Saterdag op Loftus Versfeld is om 17:00.
Bly op hoogte van al die jongste sportnuus deur Nuus24Sport op Twitter te volg.
- Sport24