Matt Giteau se kop rol
2011-07-20 08:02
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Sydney – Gee John O’Neill, die uitvoerende hoof van Wallaby-rugby, punte vir sy vermoë om tamboere te slaan oor alles buiten Aussie-rugby.
Hoe hy egter Saterdag die 90 000 sitplekke vir die eerste Drienasies-toets in 2011 in Australië se Olimpiese stadion (ANZ-stadion) gaan uitverkoop, weet g’n mens nie.
Vergeet van die skuld wat SA Rugby skynbaar gaan dra oor hy ’n “B-span” vir dié toets gekies het, die grootste bondgenoot vir die Bokke blyk die Aussie-afrigter, Robbie Deans, self te wees.
Die Kiwi, wat eens groot respek wêreldwyd afgedwing het vir sy vermoë om die Crusaders tot internasionale bewondering te slyp, is duidelik die kluts kwyt ná sý “B-span” teen Samoa slae gekry het.
Deans se groep vir Saterdag is selfs meer eksperimenteel as die 22-tal wat Peter de Villiers, Bok-afrigter, vir dié dag voorberei het en sluit tot groot verligting van die besoekers nié Matt Giteau in nie. Dié spelskepper het die prys betaal vir die nederlaag teen Samoa en is nie eens in die 22-tal nie.
“Hy het steeds ’n rol te speel in die toekoms van Australiese rugby,” het Deans Dinsdag onoortuigend gesê. “Ek is net nie 100% seker oor hoe en waar nie.” Sela.
Deans het Pat McCabe as senter gekies en sonder om dié Brumbies-heelagter en vleuel in dié gesig te vat, het die afrigter sy toekoms in die hande van ’n nuweling met twee toetse agter die blad geplaas.
Die Aussies het ’n gemiddeld van 25 toetse per speler in die begin-vyftiental (die Bokke s’n is 21) en daar is duidelike krake in dié span.
Hoewel Werner Kruger én Dean Greyling hul toetsdebuut maak, lyk die Aussie-stutte maar redelik verdag.
Ben Alexander is ’n bewese toetsspeler, maar is as vaskop gekies, terwyl hy hoofsaaklik loskop vir die Brumbies speel.
Sekope Kepu, wat die meeste van sy meer as 50 stryde vir die Counties-Manakau as vaskop gespeel het, gaan loskop speel.
Deans het ook die puik slot Nathan Sharpe na die bank geskuif.
Australië se span is:
Kurtley Beale (15 toetse), James O’Connor (27), Adam Ashley-Cooper (52), Pat McCabe (2), Digby Ioane (12), Quade Cooper (24), Will Genia (23), Sekope Kepu (4), Stephen Moore (56), Ben Alexander (25), Rob Simmons (6), James Horwill (25), Rocky Elsom (65), David Pocock (30), Ben McCalman (10). PLAASVERVANGERS: Saia Fainga’a (11), Pek Cowan (5), Nathan Sharpe (94), Matt Hodgson (11), Scott Higginbotham (2), Nick Phipps (1), Anthony Fainga’a (4).
Vir die jongste sportnuus volg Nuus24Sport op Twitter.
– Sport24