Matfield kry spesiale stewels vir sy honderdste toets
2010-08-25 06:40
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Pretoria – “Jou eerste wedstryd in ’n Springboktrui is baie spesiaal en om jou 50ste wedstryd as ’n Springbok te speel is ongelooflik, maar om vir jou 100ste wedstryd uit te draf is iets wat jy nooit dink sal gebeur nie.”
Só het Victor Matfield gister hier in Sunnyside gesê nadat hy ’n spesiale paar rugbystewels van Puma met die woorde “Vic 100” daarop van die voormalige Springbok Percy Montgomery ontvang het.
Montgomery was die eerste Bok wat 100 toetse gespeel het.
John Smit, Springbok-kaptein, het verlede Saterdag voor 90 000 toeskouers in die FNB-stadion in Soweto in die toets teen die Kiwi’s die tweede Springbok geword wat 100 toetse vir Suid-Afrika gespeel het.
Matfield het gesê dit is vir hom “’n ongelooflik groot eer om Saterdag in Montgomery en Smit se voetspore te kan volg”.
Die Springbokke pak Australië Saterdag op Loftus Versfeld.
“Ons hoop ons kan ons foute en swak geluk van die afgelope vier wedstryde omdraai om Saterdag met iets spesiaals vorendag te kom,” het Matfield gesê.
James Mullen, woordvoerder van Puma, het gesê ter ere van Matfield se 100ste toets gaan sowat 35 000 Victor Matfield-maskers voor die wedstryd gratis aan toeskouers buite Loftus Versfeld uitgedeel word. “Daar gaan duisende Victor Matfields langs die veld wees,” het Mullen gesê.
Matfield het gister skaam geglimlag toe Montgomery een van dié maskers opgesit het.
Ná gister se nuuskonferensie, waartydens Saterdag se Springbok-span aangekondig is, het Morné Steyn gesê hy hoop Matfield sal ’n beter 100ste toets as die Springbok-kaptein hê.
“Ongelukkig kon ons dit nie vir John teen die All Blacks deurhak nie, maar hopelik kan ons dit Saterdag vir Victor op Loftus doen.”
Bly op hoogte van al die jongste sportnuus deur Nuus24Sport op Twitter te volg.
- Sport24