Juan lei Bokke dalk gou
2010-08-31 07:15
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Bloemfontein - Peter de Villiers wil die Springbok-rugbyondersteuners waarde vir hul geld gee, daarom sal hy geeneen van sy swaargewigte vir Saterdag se Drienasies-toets hier teen die Wallabies ’n blaaskans gee nie.
“Ek moes opweeg waarvoor mense betaal en wat mense wil hê,” sê die Bok-afrigter.
“Hierdie is hul helde en hulle verdien om hulle te sien. Die belangrike punt is hoe ek die spelers deur die week bestuur sodat hulle vir 60 minute kan speel of ’n impak kan maak.
“Dit gaan nie net daaroor om ’n span te kies nie, want ek moet ook die span se rolspelers in ag neem. Ek ag die ondersteuners as belangrike rolspelers.”
Met die Bok-breier wat afgesien van noodgedwonge veranderinge nie beplan om seniors wat te veel gespeel het die week te laat rus nie, bestaan daar ’n goeie kans dat ’n speler soos die flank Juan Smith die Bokke op die toer einde vanjaar na Europa kan lei.
Smith kan die kapteinskap dan by John Smit oorneem. Dié haker kan weens te veel minute op die speelveld saam met ander soos die vleuel Bryan Habana, die slot Victor Matfield en die flank Schalk Burger ’n ruskans met die oog op 2011 se Wêreldbeker-toernooi in Nieu-Seeland gegun word.
Smith het weens beserings en persoonlike redes vanjaar ’n aantal wedstryde in die Super14- en Drienasies-reeks misgeloop wat dit vir De Villiers moontlik maak om hom as kaptein te kies, sou die Bok-breier finaal besluit om sekere spelers wel te laat rus.
Smith het byvoorbeeld nie in enige van die Bokke se Drienasies-wegtoetse gespeel nie en lyk honger vir rugby – vergeleke met Smit wat volgens sy breier te veel gespeel het.
Geen finale besluit is glo nog hieroor geneem nie, aangesien Smith ’n sleutelspeler in die Bok-span is met die oog op 2011 en De Villiers nog vroeër aangedui het dat die toer na Europa as ’n kleedrepetisie vir die Wêreldbeker-toernooi beskou word.
Maar te veel rugby kan De Villiers oortuig om Smit-hulle tuis te laat bly en die leisels aan Smith te gee.
De Villiers sê intussen hy is verheug met die impak wat sy plaasvervangers op Loftus Versfeld teen die Wallabies gemaak het. De Villiers wou nie die haker Chiliboy Ralepelle spesiaal uitsonder vir die yslike impak wat hy gemaak het nie.
Bly op hoogte van al die jongste sportnuus deur Nuus24Sport op Twitter te volg.
- Sport24