Jake: 'Los Bok-skakelpaar uit'
2011-07-26 23:08
In-diepte Verslae
Die All Blacks sê hulle is verbaas oor die besluit deur 'n Sanzar-tugverhoor om die Wallabies se Quade Cooper nie vir beweerde vuilspel te skors nie.
Kaapstad – Die voormalige Springbok-afrigter Jake White sê die grootste probleem in die Springbok-agterlyn is die gedurige gekarring aan die skrumskakel- en losskakelposisies.
White – wat onlangs as die nuwe afrigter van die Brumbies aangewys is – voel die huidige Springbok-afrigter, Peter de Villiers, verander sy skakelpaar te gereeld.
White glo die Bokke moet ‘n blaadjie uit die boek van hul Australiese en Nieu-Seelandse eweknieë neem deur met dieselfde kombinasie op 9 en 10 vol te hou.
“Die mees belangrike aspek is vir my dat die skrumskakel en losskakel gedurig verander word. Wat ek geleer het, is dat hoe meer die skakelpaar saamspeel, hoe beter is dit vir die res van die agterlyn en die span in geheel,” het White op sy webwerf, RugbyXV, gesê.
“Kyk na Cowan en Carter (Nieu-Seeland), Genia en Cooper (Australië)... veral met laasgenoemde is alles in plek, die selfvertroue groei met jou skakelpaar. Francois Hougaard is nou beseer so Ruan Pienaar het begin, en volgende week sal dit Fourie du Preez wees. Jou aanvallende spel val in plek wanneer daar ‘n beter verstandhouding tussen jou 9 en jou 10 is.”
- Vir die jongste sportnuus, volg Nuus24Sport op Twitter